ಹೆಬ್ರಿ : ಸೀತಾನದಿಯಿಂದ ತ್ಯಾಜ್ಯ ತೆರವು ಮಾಡಿದ ಸಿಬ್ಬಂದಿ

ಹೆಬ್ರಿ: ಮಠದಬೆಟ್ಟು ಸೇತುವೆ ಸಮೀಪ ಸೀತಾ ನದಿಗೆ ಎಸೆಯಲಾಗಿದ್ದ ಕಸವನ್ನು ಹೆಬ್ರಿ ಗ್ರಾಮ ಪಂಚಾಯಿತಿ ಸಿಬ್ಬಂದಿ ಶನಿವಾರ ತೆರವು ಮಾಡಿದರು.

‘ವರ್ತಕರು, ಹೋಟೆಲ್‌ ಮಾಲೀಕರು, ಕಸವನ್ನು ಹೇಗೆ ನಿರ್ವಹಣೆ ಮಾಡುತ್ತಾರೆ ಎನ್ನುವುದರ ಮೇಲೆ ಗ್ರಾಮ ಪಂಚಾಯಿತಿ ಸಿಬ್ಬಂದಿ ನಿಗಾ ವಹಿಸಬೇಕು. ಸಾರ್ವಜನಿಕ ಸ್ಥಳ, ರಸ್ತೆ ಬದಿ, ನದಿ ತೀರದಲ್ಲಿ ಕಸವನ್ನು ತಂದು ಹಾಕಿದರೆ ಮೊದಲು ಎಚ್ಚರಿಕೆ ನೀಡಿ ದಂಡ ಕಟ್ಟಿಸಿಕೊಳ್ಳಬೇಕು. ಇದೇ ಪುನರಾವರ್ತನೆಯಾದರೆ ಅಂಗಡಿಗಳಿಗೆ ನೀಡುವ ಪರವಾನಗಿಯನ್ನು ಶಾಶ್ವತವಾಗಿ ರದ್ದುಪಡಿಸಬೇಕು’ ಎಂದು ಹೆಬ್ರಿ ತಾಲ್ಲೂಕು ಪಂಚಾಯಿತಿ ಕಾರ್ಯನಿರ್ವಹಣಾಧಿಕಾರಿ ಶಶಿಧರ ಕೆ. ಜಿ, ಗ್ರಾ.ಪಂ ಪಿಡಿಒಗಳಿಗೆ ಸೂಚನೆ ನೀಡಿದ್ದಾರೆ.