ಬಂಟಕಲ್ ಎಂಜಿನಿಯರಿಂಗ್ ಕಾಲೇಜಿನಲ್ಲಿ ರಾಷ್ಟ್ರಮಟ್ಟದ ಹ್ಯಾಕಥಾನ್

ಶಿರ್ವ: ಬಂಟಕಲ್ಲು ಮಧ್ವ ವಾದಿರಾಜ ತಾಂತ್ರಿಕ ಮಹಾವಿದ್ಯಾಲಯದಲ್ಲಿ ನ. 3 ಮತ್ತು 4ರಂದು ರಾಷ್ಟ್ರಮಟ್ಟದ ಹ್ಯಾಕಥಾನ್ ಸ್ಪರ್ಧೆ ‘ಹ್ಯಾಕೋತ್ಸವ–2025’ ಆಯೋಜಿಸಲಾಗಿದೆ.

ಹ್ಯಾಕಥಾನ್‌ನಲ್ಲಿ ರಾಷ್ಟ್ರದಾದ್ಯಂತ ಸ್ನಾತಕ ಮತ್ತು ಸ್ನಾತಕೋತ್ತರ ಪದವಿ ವಿಭಾಗದ ವಿದ್ಯಾರ್ಥಿಗಳು ಭಾಗವಹಿಸಲಿದ್ದಾರೆ. ಯುವ ಅನ್ವೇಷಕರನ್ನು ಪ್ರೋತ್ಸಾಹಿಸುವ ಸಲುವಾಗಿ ನಡೆಯುವ ಈ ಸ್ಪರ್ಧೆ ಕೋಡಿಂಗ್ ಮತ್ತು ತಂತ್ರಜ್ಞಾನದ ಮೂಲಕ ಗಣಕೀಕೃತ ಪ್ರೋಗ್ರಾಂಗಳನ್ನು ರೂಪಿಸುವುದಾಗಿದೆ. 180ಕ್ಕೂ ಹೆಚ್ಚು ತಂಡಗಳು ನೋಂದಣಿಗೊಂಡಿದ್ದು, ಅವುಗಳಲ್ಲಿ 80ಕ್ಕೂ ಅಧಿಕ ಅತ್ಯುತ್ತಮ ತಂಡಗಳು ಈ ಸ್ಪರ್ಧೆಯಲ್ಲಿ ಭಾಗವಹಿಸಲಿದೆ.

ಈ ಕಾರ್ಯಕ್ರಮಕ್ಕೆ ಹೆಸರಾಂತ ಸಂಸ್ಥೆಗಳಾದ ಬಿಇ ಪ್ರಾಕ್ಟಿಕಲ್, ಸಂಗಮ್ ಒನ್, ಕಾರ್ಮಿಕ್ ಸೊಲೂಲ್ಯುಷನ್, ಪೆರ್ಸೆಂಡೆಝ್ ಗ್ರೂಪ್, ರಿಯಲ್ ಮೆಟಾ ಮೊದಲಾದವು ಸಹಕಾರ ನೀಡಲಿವೆ.

ವಿಜೇತರಿಗೆ ಪ್ರಥಮ ₹35 ಸಾವಿರ, ದ್ವಿತೀಯ ₹25 ಸಾವಿರ ಮತ್ತು ಉತ್ತಮ 4 ತಂಡಗಳಿಗೆ ತಲಾ ₹10 ಸಾವಿರ ಮೌಲ್ಯದ ಆಕರ್ಷಕ ಬಹುಮಾನ ನೀಡಲಾಗುತ್ತದೆ. ಹ್ಯಾಕೋತ್ಸವ –2025 ಇದು ಕಾಲೇಜಿನ ಮತ್ತು ಉದ್ಯಮ ಸಂಸ್ಥೆಗಳ ನಡುವೆ ಉತ್ತಮ ಸಹಕಾರ ಮತ್ತು ನಾವೀನ್ಯತೆ ಬೆಳೆಸಲು ಮಹತ್ವದ ಹೆಜ್ಜೆಯಾಗಿದೆ. ಅಲ್ಲದೆ ವಿದ್ಯಾರ್ಥಿಗಳನ್ನು ತಂತ್ರಜ್ಞಾನ ನಾಯಕರಾಗಿ ರೂಪುಗೊಳಿಸಲಿದೆ ಎಂದು ಪ್ರಕಟಣೆ ತಿಳಿಸಿದೆ.