ಹೊನ್ನಾವರ | ಚೆಕ್ ಬೌನ್ಸ್: ಆರೋಪಿಗೆ ದಂಡ

ಹೊನ್ನಾವರ: ಇಲ್ಲಿಯ ಪ್ರಾಥಮಿಕ ಸಹಕಾರಿ ಕೃಷಿ ಮತ್ತು ಗ್ರಾಮೀಣ ಅಭಿವೃದ್ಧಿ ಬ್ಯಾಂಕ್ (ಪಿ.ಎಲ್.ಡಿ.) ಗೆ ಸಾಲಗಾರರೋರ್ವರು ನೀಡಿದ್ದ ಚೆಕ್ ಬೌನ್ಸ್ ಆಗಿರುವ ಪ್ರಕರಣದ ವಿಚಾರಣೆ ನಡೆಸಿದ ಜೆ.ಎಂ.ಎಫ್.ಸಿ. ನ್ಯಾಯಾಲಯದ ನ್ಯಾಯಾಧೀಶ ಚಂದ್ರಶೇಖರ ಭಣಕಾರ ಶನಿವಾರ ತೀರ್ಪು ನೀಡಿದ್ದು, ಸಾಲಗಾರ ಆರೋಪಿಗೆ ₹1.39 ಲಕ್ಷ ದಂಡ ಹಾಗೂ ದಂಡ ತುಂಬಲು ತಪ್ಪಿದಲ್ಲಿ 6 ತಿಂಗಳ ಜೈಲು ಶಿಕ್ಷೆ ವಿಧಿಸಿದ್ದಾರೆ.

ತುಳಸಿನಗರದ ವೆಂಕಟೇಶ ನಾರಾಯಣ ಮೇಸ್ತ ಶಿಕ್ಷೆಗೊಳಗಾದ ಅಪರಾಧಿ. ವೆಂಕಟೇಶ ಸಾಲದ ಮರುಪಾವತಿಯ ಸಂದರ್ಭದಲ್ಲಿ ಬ್ಯಾಂಕ್‌ಗೆ ನೀಡಿದ್ದ ಚೆಕ್ ಅಮಾನ್ಯಗೊಂಡಿದ್ದರಿಂದ ಅವರ ವಿರುದ್ಧ ಬ್ಯಾಂಕಿನ ಅಧಿಕಾರಿಗಳು ದೂರು ನೀಡಿದ್ದರು.

ವಕೀಲರಾದ ಜಿ.ಎಸ್.ಹೆಗಡೆ ಹಾಗೂ ಎ.ಆರ್.ನಾಯ್ಕ ಬ್ಯಾಂಕ್‌ನ ಪರವಾಗಿ ನ್ಯಾಯಾಲಯದಲ್ಲಿ ವಾದ ಮಂಡಿಸಿದ್ದರು