ಕಾರವಾರ | ಆನ್‍ಲೈನ್ ಟ್ರೇಡಿಂಗ್ ಹೆಸರಿನಲ್ಲಿ ಮೋಸ: ವ್ಯಾಪಾರಿಗೆ ₹70 ಲಕ್ಷ ವಂಚನೆ

ಕಾರವಾರ: ಸಾಮಾಜಿಕ ಜಾಲತಾಣದಲ್ಲಿ ಬಂದ ಆನ್‍ಲೈನ್ ಟ್ರೇಡಿಂಗ್ ಕುರಿತ ಜಾಹಿರಾತು ನಂಬಿ ಮುಂಡಗೋಡ ತಾಲ್ಲೂಕು ಅತ್ತಿವೇರಿಯ ವ್ಯಾಪಾರಿ ಮಹೇಶ ಯಮೋಜಿ (47) ಎಂಬುವವರು ₹70 ಲಕ್ಷ ಕಳೆದುಕೊಂಡಿದ್ದಾರೆ.

‘ಆ.3 ರಂದು ಟೆಲಿಗ್ರಾಮ್ ಆ್ಯಪ್‍ನಲ್ಲಿ ಬಂದಿದ್ದ ಜಾಹಿರಾತು ಗಮನಿಸಿ ಸುಪರ್ ವಿಐಪಿ ಟ್ರೇಡಿಂಗ್ ಗ್ರುಪ್ ಎಂಬ ವಾಟ್ಸಾಪ್ ಗುಂಪಿಗೆ ಸೇರಿಕೊಂಡಿದ್ದೆ. ಆನ್‍ಲೈನ್ ಹೂಡಿಕೆ ಮಾಡಿ ಹೆಚ್ಚು ಲಾಭ ಗಳಿಸಿಕೊಡುವುದಾಗಿ ಗುಂಪಿನ ಮುಖ್ಯಸ್ಥರು ನಂಬಿಸಿ ಹಂತ ಹಂತವಾಗಿ ₹70 ಲಕ್ಷ ಹೂಡಿಕೆ ಮಾಡಿಸಿದ್ದರು. ಸೆ.16 ರಂದು ಹೂಡಿಕೆ ಮಾಡಿದ್ದ ಹಣ ಹಿಂಪಡೆಯಲು ಪ್ರಯತ್ನಿಸಿದಾಗ ತೆರಿಗೆ ಪಾವತಿಸಬೇಕು ಎಂದು ಪೀಡಿಸಿದ್ದರು. ನಂತರ ಗುಂಪಿನಿಂದ ಹೊರತೆಗೆದು ನಂಬರ್ ಕೂಡ ಬ್ಲಾಕ್ ಮಾಡಿದ್ದಾರೆ. ಈವರೆಗೂ ಹಣ ನೀಡಿಲ್ಲ’ ಎಂದು ವ್ಯಾಪಾರಿ ಸಿ.ಇ.ಎನ್ ಠಾಣೆಗೆ ದೂರು ನೀಡಿದ್ದಾರೆ.

ವ್ಯಾಪಾರಿಯ ದೂರು ಆಧರಿಸಿ ಪ್ರಕರಣ ದಾಖಲಿಸಿಕೊಳ್ಳಲಾಗಿದೆ ಎಂದುದ ಪೊಲೀಸರು ತಿಳಿಸಿದ್ದಾರೆ.