ಕಾರವಾರ | ಭಾರಿ ಮಳೆ: ಮೇಲ್ಸೇತುವೆ ತಳಭಾಗ ಜಲಾವೃತ

ಕಾರವಾರ: ಕಳೆದ ಎರಡು ದಿನಗಳಿಂದ ಬಿಡುವು ನೀಡಿದ್ದ ಮಳೆ ಶುಕ್ರವಾರ ತುಸು ಬಿರುಸು ಪಡೆಯಿತು. ಆದರೆ, ನಿರಂತರವಾಗಿ ಸುರಿಯದೆ ಆಗಾಗ ಮಾತ್ರ ಮಳೆ ಬಿದ್ದಿದ್ದರಿಂದ ಜಲಾವೃತದಂತಹ ಸಮಸ್ಯೆ ಸೃಷ್ಟಿಯಾಗಲಿಲ್ಲ.

ನಗರ ಮತ್ತು ಗ್ರಾಮಾಂತರ ಪ್ರದೇಶದಲ್ಲಿ ಮಳೆಯಿಂದ ಜನಜೀವನ ಅಸ್ತವ್ಯಸ್ತವಾಗಿತ್ತು. ಶಾಲೆ ಕಾಲೇಜುಗಳಿಗೆ ವಿದ್ಯಾರ್ಥಿಗಳು ತೆರಳುವ ಸಮಯದಲ್ಲಿ ಮಳೆ ಸುರಿದಿದ್ದರಿಂದ ಅವರು ಪರದಾಡಿದರು. ಚೆಂಡಿಯಾ, ಅರ್ಗಾ ಗ್ರಾಮಗಳ ಬಳಿ ಹೆದ್ದಾರಿಯಲ್ಲಿ ಕೆಲ ನಿಮಿಷ ನೀರು ನಿಂತಿತ್ತು.

ರಭಸದ ಮಳೆ ಬಿದ್ದ ಪರಿಣಾಮ ನಗರದಲ್ಲಿ ರಾಷ್ಟ್ರೀಯ ಹೆದ್ದಾರಿಗೆ ನಿರ್ಮಿಸಿದ ಮೇಲ್ಸೇತುವೆಯ ತಳಭಾಗದಲ್ಲಿ ನೀರು ನಿಲ್ಲುವಂತಾಗಿತ್ತು. ಕೆಲ ನಿಮಿಷಗಳ ಕಾಲ ಮಳೆ ಸುರಿದರೂ ಇಲ್ಲಿ ತಾಸುಗಟ್ಟಲೆ ನೀರು ನಿಲ್ಲುತ್ತಿದೆ. ಇದರಿಂದ ಡೆಂಗಿ ಹರಡುವ ಆತಂಕ ಎದುರಾಗಿದೆ. ಮೇಲ್ಸೇತುವೆಯ ಕೆಳಭಾಗದಿಂದ ನೀರು ಸರಾಗವಾಗಿ ಹರಿದು ಹೋಗಲು ವ್ಯವಸ್ಥೆ ಕಲ್ಪಿಸಬೇಕು ಎಂದು ಮೇಲ್ಸೇತುವೆ ಕೆಳಭಾಗದಲ್ಲಿ ಲಾರಿ ನಿಲುಗಡೆ ಮಾಡುವ ಚಾಲಕರು ಒತ್ತಾಯಿಸಿದ್ದಾರೆ.