ಕಾರವಾರ: ನಗರಸಭೆ ವ್ಯಾಪ್ತಿಯ ಗುಡ್ಡೆಹಳ್ಳಿ ರಸ್ತೆ ಶಾಪಗ್ರಸ್ತ

ಕಾರವಾರ: ‘ನಮ್ಮೂರಲ್ಲಿ ಯಾರಿಗಾದರೂ ಗಂಭೀರ ಶೀಕು (ರೋಗ) ಬಂದರೆ ಅವರನ್ನು ಆಸ್ಪತ್ರೆಗೆ ಸಾಗಿಸುವುದೇ ಕಷ್ಟ. ಸತ್ತವರ ಶವವನ್ನು ಊರಿಗೆ ತರುವುದಂತೂ ದೊಡ್ಡ ಸವಾಲು. ಇಂಥ ಕಷ್ಟಗಳನ್ನು ಕಾಣುತ್ತಲೇ ಜೀವನದ ಐದಾರು ದಶಕ ಕಳೆಯಿತು’

ಹೀಗೆ ನೋವಿನ ನುಡಿಗಳೊಂದಿಗೆ ಭಾವುಕರಾದರು ನಗರ ವ್ಯಾಪ್ತಿಯಲ್ಲೇ ಇದ್ದರೂ, ಓಡಾಟಕ್ಕೆ ಸುಸಜ್ಜಿತ ರಸ್ತೆ ಕಾಣದ ಗುಡ್ಡೆಹಳ್ಳಿ ಗ್ರಾಮದ ವಿಶ್ರಾಮ ಗೌಡ.

‘ನಗರಸಭೆ ವ್ಯಾಪ್ತಿಯಲ್ಲೇ ಇದ್ದರೂ ಕುಗ್ರಾಮಗಳಿಗಿಂತ ಕನಿಷ್ಠ ಸೌಲಭ್ಯ ನಮ್ಮೂರಿಗಿದೆ. ಗುಡ್ಡೆಹಳ್ಳಿಯ ಶಿಖರದಿಂದ ಕಾರವಾರ ನೋಡಲು ಅಂದವಾಗಿ ಕಾಣುತ್ತದೆ. ಅದಕ್ಕಾಗಿ ಜನ ಬರುತ್ತಾರೆ. ಹೀಗೆ ಬಂದವರು ಸೌಲಭ್ಯಗಳ ಕೊರತೆಯ ಊರಿನ ಸ್ಥಿತಿ ಕಂಡು ಮರುಗುತ್ತಾರೆ’ ಎನ್ನುತ್ತ ಊರಿನ ದುಸ್ಥಿತಿಯನ್ನು ವಿವರಿಸಿದರು.

‘ಊರಿನ ಹಿರಿಯ ರಾಮಾ ಗೌಡ ಮೃತದೇಹವನ್ನು ಕೋಲಿಗೆ ಕಟ್ಟಿಕೊಂಡ ಬಂದ ಸ್ಥಿತಿ ಊರಿನ ಕಷ್ಟದ ಸ್ಥಿತಿ ವಿವರಿಸಿದೆ. ಇಂಥದ್ದೇ ಸಮಸ್ಯೆಯನ್ನು ಹಲವು ಬಾರಿ ಅನುಭವಿಸಿದ್ದೇವೆ. ಐದು ದಿನಗಳ ಹಿಂದೆ ಗ್ರಾಮದ 11 ವರ್ಷದ ಬಾಲಕಿಯೊಬ್ಬಳಿಗೆ ವಿಷಕಾರಿ ಹಾವು ಕಚ್ಚಿತ್ತು. ಆಕೆಯನ್ನು ಜಿಲ್ಲಾಸ್ಪತ್ರೆಗೆ ಕರೆದೊಯ್ದು ಚಿಕಿತ್ಸೆ ಕೊಡಿಸುವಷ್ಟರಲ್ಲಿ ಹೈರಾಣಾಗುವ ಸ್ಥಿತಿ ಎದುರಿಸಬೇಕಾಯಿತು’ ಎಂದು ಗ್ರಾಮದ ಹಿರಿಯರೊಬ್ಬರು ಸಮಸ್ಯೆ ತೆರೆದಿಟ್ಟರು.

‘25ಕ್ಕೂ ಹೆಚ್ಚು ಮನೆಗಳನ್ನು ಒಳಗೊಂಡಿರುವ ಗುಡ್ಡೆಹಳ್ಳಿಯಲ್ಲಿ 120ರಷ್ಟು ಜನಸಂಖ್ಯೆ ಇದೆ. ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆ ಇದ್ದು, 10 ಮಂದಿ ವಿದ್ಯಾರ್ಥಿಗಳಿದ್ದಾರೆ. ಪ್ರೌಢಶಿಕ್ಷಣಕ್ಕೆ ಬಿಣಗಾ ಅಥವಾ ಕಾರವಾರ ನಗರದಲ್ಲಿನ ಪರಿಚಯಸ್ಥರು, ಬಂಧುಗಳ ಮನೆಯಲ್ಲಿ ಮಕ್ಕಳನ್ನು ಉಳಿಯಲು ಬಿಡಬೇಕಾದ ಸ್ಥಿತಿ ಇದೆ’ ಎಂದರು.