ಯಲ್ಲಾಪುರ: ಬಳಲಿದ ಹಾವಿಗೆ ಆರೈಕೆ ಭಾಗ್ಯ!

ಯಲ್ಲಾಪುರ: ತಾಲ್ಲೂಕಿನ ಭರತನಹಳ್ಳಿಯ ಉರಗ ರಕ್ಷಕ ಮಂಜು ಅವರು ಬಸವಳಿದು ಬಿದ್ದಿದ್ದ ನಾಗರ ಹಾವೊಂದಕ್ಕೆ ಚಿಕಿತ್ಸೆ ಕೊಡಿಸಿ ರಕ್ಷಿಸಿದ್ದಾರೆ.

ರೈತರೊಬ್ಬರ ಹೊಲದ ಬಳಿ ನಿತ್ರಾಣ ಸ್ಥಿತಿಯಲ್ಲಿದ್ದ ಹಾವನ್ನು ಅವರು ಮಂಗಳವಾರ ಉಮ್ಮಚ್ಗಿ ಪಶು ಆಸ್ಪತ್ರೆಗೆ ತಂದು ಚಿಕಿತ್ಸೆ ಕೊಡಿಸಿದರು. ಪಶುವೈದ್ಯ ರಾಜೇಶ್ ಅವರು ಹಾವಿಗೆ ಡ್ರಿಪ್ ನೀಡಿ ಉಪಚಾರ ಮಾಡಿದರು.

‘ಇದು ನಾಲ್ಕರಿಂದ ಐದು ವರ್ಷದ ಹೆಣ್ಣು ನಾಗರ ಹಾವು. ರೈತರು ಹೊಲಕ್ಕೆ ಔಷಧ ಸಿಂಪಡಣೆ ಮಾಡಿದಾಗ ಅಲ್ಲಿ ಸಿಕ್ಕ ಯಾವುದೋ ಆಹಾರವನ್ನು ತಿಂದು ಅಸ್ವಸ್ಥಗೊಂಡಿರಬಹುದು. ಇನ್ನೂ ಎರಡು ದಿವಸ ಔಷಧೋಪಚಾರ ಮಾಡಬೇಕಿದೆ’ ಎಂದು ಡಾ. ರಾಜೇಶ್ ತಿಳಿಸಿದ್ದಾರೆ.

ಹಾವು ಚೇತರಿಸಿಕೊಂಡ ಬಳಿಕ ಮತ್ತೆ ಕಾಡಿಗೆ ಬಿಡುವುದಾಗಿ ಮಂಜು ತಿಳಿಸಿದ್ದಾರೆ.