ಮುಂಡಗೋಡ: ಉರಗ ರಕ್ಷಕ ಗಸ್ತು ವನಪಾಲಕ

ಮುಂಡಗೋಡ: ತಾಲ್ಲೂಕಿನ ಕಾತೂರ ಅರಣ್ಯ ವಲಯ ವ್ಯಾಪ್ತಿಯ ಪಾಳಾ ಶಾಖೆಯ ಹುಡೇಲಕೊಪ್ಪ ಗಸ್ತಿನಲ್ಲಿ ವನಪಾಲಕರಾಗಿರುವ ಮುತ್ತುರಾಜ ಹಳ್ಳಿ ಅವರು ಸಾವಿರಕ್ಕೂ ಹೆಚ್ಚು ವಿವಿಧ ಪ್ರಬೇಧದ ಹಾವುಗಳನ್ನು ಹಿಡಿದು, ಸುರಕ್ಷಿತವಾಗಿ ಕಾಡಿಗೆ ಬಿಡುವ ಕೆಲಸ ಮಾಡಿದ್ದಾರೆ.

‘ಹಾವುಗಳನ್ನು ಸರಿಯಾದ ರೀತಿಯಲ್ಲಿ ಹಿಡಿದು, ಅವುಗಳಿಗೂ ಬದುಕಲು ಅವಕಾಶ ಕಲ್ಪಿಸಿದರೆ ಅದರಲ್ಲಿ ಸಿಗುವ ಸಂತಸ ಹೆಚ್ಚಿರುತ್ತದೆ. ಈವರೆಗೆ ಹೆಬ್ಬಾವು, ಕೊಳಕು ಮಂಡಲ, ಉರಿ ಮಂಡಲ, ನಾಗರಹಾವು, ಕಟ್ಟು ಹಾವು, ಬೆಕ್ಕಿನ ಕಣ್ಣಿನ ಹಾವು, ಆಭರಣದ ಹಾವು, ಕೆರೆ ಹಾವು, ನೀರು ಹಾವು, ಹಸಿರು ಹಾವು ಸೇರಿದಂತೆ ಸುಮಾರು ಒಂದು ಸಾವಿರಕ್ಕೂ ಹೆಚ್ಚು ಹಾವುಗಳನ್ನು ರಕ್ಷಣೆ ಮಾಡಿದ್ದೇನೆ. ಹಾವಿಗೆ ಯಾವುದೇ ತೊಂದರೆ ಆಗದಂತೆ ಸಂರಕ್ಷಿಸುವುದಕ್ಕೆ ಹೆಚ್ಚಿನ ಆದ್ಯತೆ ನೀಡುತ್ತೇನೆ. ಹಾವು ಕಂಡುಬಂದರೆ ಸಂಪರ್ಕಿಸಬಹುದು (ಮೊ.9740656919)’ ಎಂದು ಮುತ್ತುರಾಜ ಹಳ್ಳಿ ತಿಳಿಸಿದರು.

‘ಹಾವುಗಳನ್ನು ಹಿಡಿದು ಸುರಕ್ಷಿತವಾಗಿ ಕಾಡಿಗೆ ಬಿಡುವಲ್ಲಿ ಮುತ್ತುರಾಜ ಹಳ್ಳಿ ಉತ್ತಮ ಕೆಲಸ ಮಾಡುತ್ತಿದ್ದಾರೆ. ಹಾವುಗಳನ್ನು ಸಾಯಿಸುವುದು ವನ್ಯಜೀವಿ ಸಂರಕ್ಷಣೆ ಕಾಯ್ದೆ ಪ್ರಕಾರ ಶಿಕ್ಷಾರ್ಹ ಅಪರಾಧ. ಹಾವುಗಳು ಮನೆಯಲ್ಲಿ ಕಂಡುಬಂದಲ್ಲಿ ಅವುಗಳಿಗೆ ತೊಂದರೆ ನೀಡದೆ ಅರಣ್ಯ ಇಲಾಖೆಗೆ ಮಾಹಿತಿ ನೀಡಬೇಕು’ ಎಂದು ಎಸಿಎಫ್ ರವಿ ಹುಲಕೋಟಿ ಹೇಳಿದರು.