ಗೋವಾದಲ್ಲಿ ಭೀಕರ ಅಪಘಾತ: ಕಾರವಾರದ ಮೂವರು ಸಾವು

ಕಾರವಾರ: ಗೋವಾದ ಕಾಣಕೋಣದಲ್ಲಿ ಬುಧವಾರ ಸಂಜೆ ನಡೆದ ಭೀಕರ ಅಪಘಾತದಲ್ಲಿ ಕಾರವಾರ ತಾಲ್ಲೂಕಿನ ಮಾಜಾಳಿಯ ಒಂದೇ ಕುಟುಂಬದ ಮೂವರು ಮೃತಪಟ್ಟಿದ್ದಾರೆ. ಏಳು ಮಂದಿ ಗಾಯಗೊಂಡಿದ್ದಾರೆ.

ಮೃತರನ್ನು ಉಲ್ಲಾಸ ರಾಮ ನಾಗೇಕರ್ (64), ಅವರ ಪತ್ನಿ ವೀಣಾ (60) ಹಾಗೂ ಮಗ ಹರೀಶ (35) ಎಂದು ಗುರುತಿಸಲಾಗಿದೆ. ಅವರು ಪ್ರಸ್ತುತ ವಾಸ್ಕೋದ ಉಪಾಸ ನಗರದಲ್ಲಿ ವಾಸವಿದ್ದರು. ಅವರು ಕಾರವಾರದಿಂದ ಪುನಃ ಹೋಗುತ್ತಿದ್ದರು.

ರಾಷ್ಟ್ರೀಯ ಹೆದ್ದಾರಿ 66ರಲ್ಲಿ ರಾಜಬಾಗ್– ತರೀರ್ ಬೈಪಾಸ್ ಬಳಿ ಒಂದು ಕಾರಿನ ಚಾಲಕ ನಿಯಂತ್ರಣ ತಪ್ಪಿ ರಸ್ತೆ ವಿಭಜಕಕ್ಕೆ ಡಿಕ್ಕಿ ಹೊಡೆದರು. ನಂತರ ಎದುರಿನ ಪಥದಲ್ಲಿದ್ದ ಮತ್ತೊಂದು ಕಾರಿಗೆ ಹಾಗೂ ದ್ವಿಚಕ್ರ ವಾಹನಕ್ಕೆ ಡಿಕ್ಕಿಯಾಯಿತು.ಈ ಜಾಗದಲ್ಲಿ ಇತ್ತೀಚಿನ ದಿನಗಳಲ್ಲಿ ನಡೆದ ಏಳನೇ ಅಪಘಾತ ಇದಾಗಿದೆ ಎಂದು ಪ್ರತ್ಯಕ್ಷದರ್ಶಿಗಳು ಹೇಳಿದ್ದಾರೆ.

ಮೃತರು ರೆನೊ ಕ್ವಿಡ್ ಕಾರಿನಲ್ಲಿದ್ದರು. ಅಪಘಾತದ ರಭಸಕ್ಕೆ ಹ್ಯುಂಡೈ ಐ 20 ಕಾರು ಈ ಕಾರಿನ ಮೇಲೆ ಮಗುಚಿತು. ಗಾಯಾಳುಗಳಲ್ಲಿ ಇಬ್ಬರ ಸ್ಥಿತಿ ಚಿಂತಾಜನಕವಾಗಿದೆ. ಎಲ್ಲ ಗಾಯಾಳುಗಳನ್ನು ಬಾಂಬೋಲಿಮ್ ಸರ್ಕಾರಿ ಆಸ್ಪತ್ರೆಗೆ ದಾಖಲಿಸಲಾಗಿದೆ.