ಮರಿಯಮ್ಮನಹಳ್ಳಿ: ಹಗಲು ಪಾಠ, ರಾತ್ರಿ ಅಲ್ಲೇ ವಸತಿ

ಮರಿಯಮ್ಮನಹಳ್ಳಿ: ‘ಅದು ಹೆಸರಿಗೆ ಸಾರ್ವಜನಿಕ ಸಮುದಾಯ ಭವನ, ಆ ಒಂದು ಸೂರಿನಡಿ ಶಾಲಾ ಕಚೇರಿ, ಶಿಕ್ಷಕರ ಕೊಠಡಿ, 2 ತರಗತಿಗಳು, 100 ವಿದ್ಯಾರ್ಥಿಗಳು, ಅವರ ಆಟ, ಪಾಠ, ಓದು, ನಿದ್ದೆ...’

ಇದು ಪಟ್ಟಣ ಹೊರವಲಯದ ಇಂದಿರಾನಗರದ ಸಾರ್ವಜನಿಕ ಸಮುದಾಯ ಭವನದಲ್ಲಿ ಕಾರ್ಯನಿರ್ವಹಿಸುತ್ತಿರುವ ಅಲ್ಪಸಂಖ್ಯಾತರ ಮೊರಾರ್ಜಿ ದೇಸಾಯಿ ವಸತಿ ಶಾಲೆಗೆ ಸೋಮವಾರ ‘ಪ್ರಜಾವಾಣಿ’ ಭೇಟಿ ನೀಡಿದಾಗ ಕಂಡು ಬಂದ ದೃಶ್ಯ.

ಕಳೆದ ವರ್ಷ ಬೇರೆಡೆ ಸ್ಥಳಾಂತರವಾಗುತ್ತಿದ್ದ ವಸತಿ ಶಾಲೆಯನ್ನು, ಪಟ್ಟಣಕ್ಕೆ ಹೊಂದಿಕೊಂಡ ಡಣಾಯಕನಕೆರೆ ಗ್ರಾಮ ಪಂಚಾಯಿತಿ ವ್ಯಾಪ್ತಿಗೆ ಒಳಪಡುವ ಇಂದಿರಾನಗರದ ಸಾರ್ವಜನಿಕ ಸಮುದಾಯ ಭವನದಲ್ಲಿ ಆರಂಭಿಸಲಾಯಿತು.

ಸೂಕ್ತ ಕಟ್ಟಡದ ವ್ಯವಸ್ಥೆ ಇಲ್ಲದಿರುವುದರಿಂದ ಬಾಲಕರಿಗೆ ಮಾತ್ರ ಇಲ್ಲಿ ಅವಕಾಶ ನೀಡಲಾಗಿದೆ. ಸುಮಾರು 60x40ರ ನಿವೇಶನದ ಒಂದೇ ಸೂರಿನಡಿ 6 ಹಾಗೂ 7ನೇ ತರಗತಿ, ಮುಖ್ಯಶಿಕ್ಷಕರ ಕಚೇರಿ, ಮಕ್ಕಳ ವಸತಿ ಕಲ್ಪಿಸಲಾಗಿದ್ದು, ಹಗಲು ಪಾಠ, ರಾತ್ರಿ ವಸತಿ ಎನ್ನುವಂತಾಗಿದೆ ಇಲ್ಲಿನ ಪರಿಸ್ಥಿತಿ.

ಗ್ರಾಮ ಪಂಚಾಯಿತಿ ಸದಸ್ಯ ಪಿ.ಸೋಮಪ್ಪ ಅವರು ಸಮುದಾಯ ಭವನದ ಪಕ್ಕದಲ್ಲಿ ಕೊಠಡಿಯೊಂದನ್ನು ನಿರ್ಮಿಸಿಕೊಟ್ಟಿದ್ದರಿಂದ ಅಲ್ಲೇ ಪಡಿತರ ದಾಸ್ತಾನಿನ ಜೊತೆಗೆ ಅಡುಗೆ ತಯಾರಿಸಲಾಗುತ್ತಿದೆ ಎನ್ನುತ್ತಾರೆ ಪ್ರಾಚಾರ್ಯ ಮಂಜುನಾಥ್ ಪಾಟೀಲ್.

ಈ ವಸತಿ ಶಾಲೆಗೆ ಸೂಕ್ತ ಹಾಗೂ ಸ್ವಂತ ಕಟ್ಟಡ ನಿರ್ಮಾಣ ಯಾವಾಗ ಎಂಬುದು ಪೋಷಕರು, ಸ್ಥಳೀಯರ ಪ್ರಶ್ನೆಯಾಗಿದೆ.

ಮಕ್ಕಳು 100 ಶೌಚಾಲಯ 3

ಈ  ವಸತಿ ಶಾಲೆಯಲ್ಲಿ 6 ಜನ ಅತಿಥಿ ಶಿಕ್ಷಕರು ಇಬ್ಬರು ಅಡುಗೆಯವರು ಸೇರಿದಂತೆ ಗ್ರೂಪ್‌ ಡಿ ಒಬ್ಬರು ಕಾರ್ಯನಿರ್ವಹಿಸುತ್ತಿದ್ದು ಇರುವ ಮೂರು ಶೌಚಾಲಯಗಳನ್ನು 100 ವಿದ್ಯಾರ್ಥಿಗಳು ಬಳಸಬೇಕಿದೆ. ಭವನದ ಸುತ್ತ ಕಾಂಪೌಂಡ್ ವ್ಯವಸ್ಥೆ ಇಲ್ಲದ್ದರಿಂದ ರಕ್ಷಣೆಗಾಗಿ ಪ್ಲಾಸ್ಟಿಕ್ ಪರದೆಯ ಮೂಲಕ ಸುತ್ತಗೋಡೆಯನ್ನು ನಿರ್ಮಿಸಿಕೊಂಡಿದ್ದಾರೆ.