ಹರಪನಹಳ್ಳಿ | ವ್ಯಕ್ತಿ ಆತ್ಮಹತ್ಯೆ: ಮೂವರ ಬಂಧನ

ಹರಪನಹಳ್ಳಿ: ವ್ಯಕ್ತಿಯೊಬ್ಬರು ವಿಷ ಸೇವಿಸಿ ಆತ್ಮಹತ್ಯೆ ಮಾಡಿಕೊಂಡ ಪ್ರಕರಣಕ್ಕೆ ಸಂಬಂಧಿಸಿ ಪೊಲೀಸರು ಶುಕ್ರವಾರ ಮೂವರನ್ನು ಬಂಧಿಸಿದ್ದಾರೆ.

ಪತ್ರಿ ಲೋಕೇಶ (38) ಆತ್ಮಹತ್ಯೆಗೆ ಶರಣಾದವರು.

‘ಲೋಕೇಶ ಅವರು ಆತ್ಮಹತ್ಯೆಗೂ ಮುನ್ನ ಮೊಬೈಲ್‌ನಲ್ಲಿ ವಿಡಿಯೊ ಮಾಡಿದ್ದಾರೆ. ಅದರಲ್ಲಿ, ₹ 100ಕ್ಕೆ ₹10 ಬಡ್ಡಿಯಂತೆ ಸಾಲ ಪಡೆದಿರುವ ಕುರಿತು ಹೇಳಿಕೊಂಡಿದ್ದಾರೆ. ಸಾಲ ಮರುಪಾವತಿ ಮಾಡುವಂತೆ ಸಾಲ ಕೊಟ್ಟಿರುವವರು ಕಿರುಕುಳ ಕೊಟ್ಟಿದ್ದಾರೆ. ಇದರಿಂದ ಬೇಸತ್ತು ಲೋಕೇಶ ವಿಷ ಸೇವಿಸಿ ಆತ್ಮಹತ್ಯೆಗೆ ಶರಣಾಗಿದ್ದಾರೆ’ ಎಂದು ಪೊಲೀಸರು ತಿಳಿಸಿದ್ದಾರೆ.

ಸಾಲ ವಸೂಲಿ ನೆಪದಲ್ಲಿ ಕಿರುಕುಳ ಕೊಟ್ಟಿರುವ ಮ್ಯಾಕಿ ದುರುಗಪ್ಪ, ಕೋಳಿ ಅಂಗಡಿ ಚೌಡಪ್ಪ, ದೊಡ್ಡಮನಿ ದುರುಗಪ್ಪ ಆರೋಪಿತರು.

ಹರಪನಹಳ್ಳಿ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.