ಇಂಡಿ -ಸಾಲೋಟಗಿ ಗಾಡಿ ರಸ್ತೆ ಒತ್ತುವರಿ: ತೆರವುಗೊಳಿಸಲು ಸಾರ್ವಜನಿಕರ ಆಗ್ರಹ

ಇಂಡಿ : ಪಟ್ಟಣದ ಇಂಡಿ -ಸಾಲೋಟಗಿ ಗ್ರಾಮದ ಹಳೆಯ ಗಾಡಿ ರಸ್ತೆಯನ್ನು ಮಿನಿವಿಧಾನ ಸೌಧದಿಂದ ಗಣಪತಿ ಗುಡಿ ವರೆಗೆ ಸುಮಾರು 100 ಮೀಟರ್ ರಸ್ತೆ ಒತ್ತುವರಿ ವಿವಾದ ಹಲವು ವರ್ಷಗಳಿಂದ ಬಗೆಹರಿಯದೇ ಸಾರ್ವಜನಿಕ ಸಂಚಾರಕ್ಕೆ ತೊಂದರೆಯಾಗಿದೆ.

ಒತ್ತುವರಿ ಜಾಗವನ್ನು ಈಗಾಗಲೇ ಪೊಲೀಸ್ ಇಲಾಖೆ ತೆರವುಗೊಳಿಸಿದೆ. ಆದರೆ, ರಸ್ತೆಯ ಅಕ್ಕಪಕ್ಕದ ನಿವಾಸಿಗಳು ಮಾಡಿರುವ ಒತ್ತುವರಿ ತೆರವಾಗದೇ ಇರುವುದು ಸಾರ್ವಜನಿಕರ ಆಕ್ರೋಶಕ್ಕೆ ಕಾರಣವಾಗಿದೆ.

ಒತ್ತುವರಿ ತೆರವಿಗೆ ಆಗ್ರಹಿಸಿ ಕಳೆದ 16 ವರ್ಷಗಳಿಂದ ಪುರಸಭೆಗೆ, ತಾಲ್ಲೂಕು ಆಡಳಿತಕ್ಕೆ, ಲೋಕಾಯುಕ್ತ ಇಲಾಖೆಗೆ ಸಾರ್ವಜನಿಕರು ಮನವಿ ಪತ್ರ ಸಲ್ಲಿಸಿದರೂ ಇಲ್ಲಿಯವರೆಗೆ ಯಾವುದೇ ಕ್ರಮ ಆಗಿಲ್ಲ. 

ಒತ್ತುವರಿಯಾಗಿರುವ ಈ ರಸ್ತೆಯ ಮೇಲೆ ಕಂಪೌಂಡ್‌ ಗೋಡೆಯ ಕಲ್ಲು, ಮಣ್ಣು ಮತ್ತು ಮತ್ತೊಂದು ಬದಿಗೆ ಬೆಳೆದಿರುವ ಮುಳ್ಳಿನ ಕಂಟಿ ರಸ್ತೆಯ ಮೇಲೆ ಬಿದ್ದು, ಅಲ್ಲಿದ್ದ ಹಳೆಯ ಗಟಾರ ಮುಚ್ಚಿಕೊಂಡು ಗಟಾರದ ಕೊಳಚೆ ನೀರು ಮುಂದೆ ಸಾಗದೇ ಅಕ್ಕಪಕ್ಕದವರ ಮನೆ ಸೇರುತ್ತಿದೆ.

ಕೊಳಚೆ ನೀರು ಗಬ್ಬು ವಾಸನೆ ಬೀರಿದ್ದಲ್ಲದೇ ಕಚ್ಚುವ ಹುಳಗಳು ಹುಟ್ಟಿಕೊಂಡಿವೆ. ಸಾರ್ವಜನಿಕರು ತಮ್ಮ ಮನೆಗಳಲ್ಲಿ ವಾಸ ಮಾಡಲು ಕಷ್ಟವಾಗುತ್ತಿದೆ. ಈ ರಸ್ತೆಯ ಮುಂದಿನ ಕೆಲಸಕ್ಕೆ ಅಧಿಕಾರಿಗಳು ಕ್ರಮ ಜರುಗಿಸುತ್ತಿಲ್ಲ ಎಂದು ಸಾರ್ವಜನಿಕರು ಆರೋಪಿಸುತ್ತಿದ್ದಾರೆ.

ಈ ರಸ್ತೆಯನ್ನು ತೆರವು ಮಾಡಿಸಿಕೊಟ್ಟರೆ ರಸ್ತೆ ಅಭಿವೃದ್ಧಿ ಮಾಡಿಕೊಡುವದಾಗಿ ಸ್ಥಳೀಯ ಪುರಸಭೆ ಹಲವಾರು ಸಲ ಠರಾವು ಪಾಸು ಮಾಡಿದೆ. ಆದರೂ ಕೂಡಾ ಈ ರಸ್ತೆ ಮಾತ್ರ ತೆರವಾಗುತ್ತಿಲ್ಲ. ಇಲ್ಲಿ 60 ಅಡಿ ಅಳತೆಯ ರಸ್ತೆಯಿದೆ ಎಂದು ಸಿಟಿ ಸರ್ವೆ ಇಲಾಖೆ ಸುಮಾರು ಸಲ ಸರ್ವೆ ಮಾಡಿ, ಜಾಗ ಗುರುತಿಸಿ ಕಂಬಗಳನ್ನೂ ಕೂಡಾ ನಡೆಸಿದೆ. ಇಷ್ಟಾದರೂ ಕೂಡಾ ಈ ರಸ್ತೆ ಮಾತ್ರ ತೆರವು ಮಾಡುತ್ತಿಲ್ಲ. ಸ್ಥಳೀಯ ಶಾಸಕರು ಮಧ್ಯ ಪ್ರವೇಶಿಸಿ, ಸಮಸ್ಯೆ ಬಗೆಹರಿಸಬೇಕು ಎಂದು ಸಾರ್ವಜನಿಕರು ಮನವಿ ಮಾಡಿದ್ದಾರೆ.