3000 ಹೆಣ್ಣುಕರುಗಳಿಗೆ ಕಂದು ರೋಗ ಲಸಿಕೆ

ಇಂಡಿ: ತಾಲ್ಲೂಕಿನಲ್ಲಿ 4 ರಿಂದ 8 ತಿಂಗಳ ಒಳಗೆ ಇರುವ ಆಕಳು ಅಥವಾ ಎಮ್ಮೆ ಕರುಗಳಿಗೆ ಲಸಿಕೆ ಹಾಕುವ ಅಭಿಯಾನ ಆರಂಭಿಸಲಾಗಿದೆ ಎಂದು ತಾಲ್ಲೂಕು ಮುಖ್ಯ ಪಶು ವೈದ್ಯಾಧಿಕಾರಿ ಡಾ. ರಾಜಕುಮಾರ ಅಡಕಿ ಹೇಳಿದರು.

ಮಂಗಳವಾರ ಪಟ್ಟಣದ ಪುರಸಭೆ ಆಧೀನದಲ್ಲಿ ಬರುವ ಸಾತಪುರ ಗ್ರಾಮದಲ್ಲಿ ಹೆಣ್ಣು ಕರುವಿಗೆ ಲಸಿಕೆ ನೀಡುವ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು.

‘4 ರಿಂದ 8 ತಿಂಗಳ ಕರುಗಳಿಗೆ ಕಂದು ರೋಗ ಬರುತ್ತಿದ್ದು, ಈ ಲಸಿಕೆ ಹಾಕಲಾಗುತ್ತಿದೆ. ಕಂದು ರೋಗ ಬ್ಯಾಕ್ಟಿರಿಯಾ ರೋಗವಾಗಿದ್ದು ಒಂದು ದನದಿಂದ ಇನ್ನೊಂಕ್ಕೆ ಹರಡುತ್ತದೆ. ಹೀಗಾಗಿ ವರ್ಷದಲ್ಲಿ ಒಂದು ಬಾರಿ ಲಸಿಕೆ ನೀಡಲಾಗುತ್ತಿದೆ. ಈಗಾಗಲೇ ತಾಲ್ಲೂಕಿನಲ್ಲಿ ಜುಲೈ 21 ರಿಂದ ಹಾಕಲು ಆರಂಭಿಸಿದ್ದು ಅ. 10ರವರೆಗೆ ಒಟ್ಟು 3,000 ಕರುಗಳಿಗೆ ಲಸಿಕೆ ಹಾಕಲಾಗುತ್ತಿದೆ. ಇದರಿಂದ ಕರುಗಳಿಗೆ ಜೀವಮಾನದಲ್ಲಿ ಗರ್ಭ ಕಟ್ಟಿದಾಗ ಗರ್ಭಪಾತ ಆಗದಂತೆ ಲಸಿಕೆ ತಡೆಯುತ್ತದೆ’ ಎಂದರು.

ಪಟ್ಟಣದ ಪಶು ಆಸ್ಪತ್ರೆ, ತಾಲ್ಲೂಕಿನಲ್ಲಿರುವ ಪಶು ಚಿಕಿತ್ಸಾಲಯ, ಪ್ರಾಥಮಿಕ ಪಶು ಚಿಕಿತ್ಸಾ ಕೇಂದ್ರಗಳಲ್ಲಿ ಲಸಿಕೆ ನೀಡಲಾಗುತ್ತದೆ. ಅದಲ್ಲದೇ ಪಶು ಆಸ್ಪತ್ರೆ ಸಿಬ್ಬಂದಿ ರೈತರ ಹೊಲಗಳಿಗೆ ಹೋಗಿಯೂ ಲಸಿಕೆ ನೀಡುತ್ತಾರೆ ಎಂದರು.

ಪಶು ವೈದ್ಯಾಧಿಕಾರಿ ಡಾ. ರವಿಶಂಕರ ಬಿರಾದಾರ, ಡಾ. ವಿನಯ ಜಂಬಗಿ, ಎಸ್.ಎಂ. ಮೂಡಲಗೇರಿ, ಜಾವೇದ ಬಾಗವಾನ, ರಾಮಣ್ಣ ಉಪ್ಪಾರ, ರಮೇಶ ನರಳೆ ಇದ್ದರು.