ಶಹಾಪುರ | ವರದಕ್ಷಿಣೆ ಕಿರುಕುಳ: 2 ವರ್ಷ ಜೈಲು ಶಿಕ್ಷೆ

ಶಹಾಪುರ: ಪತ್ನಿಗೆ ವರದಕ್ಷಿಣೆ ತರುವಂತೆ ಕಿರುಕುಳ ನೀಡಿರುವುದು ಸಾಬೀತು ಆಗಿರುವದರಿಂದ ಜೆಎಂಎಫ್‌ಸಿ ನ್ಯಾಯಾಲಯದ ನ್ಯಾಯಾಧೀಶೆ ಶೋಭಾ ಅವರು ಶನಿವಾರ ನಾಲ್ವರಿಗೆ ಎರಡು ವರ್ಷ ಜೈಲು ಶಿಕ್ಷೆ ಹಾಗೂ ₹20 ಸಾವಿರ ದಂಡ ವಿಧಿಸಿ ಆದೇಶ ನೀಡಿದ್ದಾರೆ.

ನಗರದ ಲಕ್ಷಿಕಾಂತ, ಮಾನಪ್ಪ, ಭೂದೇವಿ ಹಾಗೂ ಮಾಲಾ ಶಿಕ್ಷೆಗೆ ಒಳಗಾದ ವ್ಯಕ್ತಿಗಳು. 2022 ಅಕ್ಟೋಬರ 31ರಂದು ಲಕ್ಷ್ಮಿಕಾಂತ ಎಂಬುವವರು ಪತ್ನಿ ಮಂಜುಳಾ ಅವರಿಗೆ ತವರು ಮನೆಯಿಂದ ವರದಕ್ಷಣೆ ತರುವಂತೆ ಕಿರುಕುಳ ನೀಡಿದ್ದರು. ಅದಕ್ಕೆ ಉಳಿದ ಮೂವರು ಸಹಕಾರ ನೀಡಿದ್ದರು ಎಂದು ಶಹಾಪುರ ಠಾಣೆಯಲ್ಲಿ ದೂರು ದಾಖಲಾಗಿತ್ತು.

ತನಿಖಾಧಿಕಾರಿಯಾಗಿದ್ದ ಮರೆಪ್ಪ ಎ.ಎಸ್.ಐ ಅವರು ನ್ಯಾಯಾಲಯಕ್ಕೆ ದೋಷಾರೋಪಣೆ ಪತ್ರ ಸಲ್ಲಿಸಿದ್ದರು. ದೂರುದಾರರ ಪರವಾಗಿ ಎಪಿಪಿ ದಿವ್ಯಾರಾಣಿ ನಾಯಕ ಸುರಪುರ ವಾದಿಸಿದ್ದರು.