ಸುರಪುರ | ಕುಸಿದ ತಾಪಮಾನ, ಕೊರೆವ ಚಳಿಗೆ ಜನ ತತ್ತರ

ಸುರಪುರ: ಕಳೆದ ಎರಡು ದಿನಗಳಿಂದ ನಗರದ ತಾಪಮಾನ ಸರ್‍ರನೆ ಇಳಿದಿದೆ. ನಸುಕಿನಲ್ಲಿ ಚಳಿಯ ಪ್ರಭಾವ ಹೆಚ್ಚಾಗಿದ್ದು, ಜನರು ಬೆಳಿಗ್ಗೆ 8 ಗಂಟೆಯವರೆಗೆ ಮನೆಯಿಂದ ಹೊರಗೆ ಬರುತ್ತಿಲ್ಲ.

ಮಹಿಳೆಯರು, ವೃದ್ಧರು, ಮಕ್ಕಳ ಪಾಡಂತು ದೇವರೇ ಬಲ್ಲ ಎಂಬಂತಾಗಿದೆ. ಸ್ವೆಟರ್, ಮಂಕಿಕ್ಯಾಪ್ ಹಾಕಿಕೊಂಡರೂ ಚಳಿ ಬಿಡುತ್ತಿಲ್ಲ. ರಗ್‌ ಹೊದ್ದುಕೊಂಡು ಮಲಗಿದರೂ ನಡಗುವುದು ತಪ್ಪುತ್ತಿಲ್ಲ. ನಸುಕಿನಲ್ಲಿ ಎದ್ದು ಮನೆ ಮುಂದೆ ರಂಗೋಲಿ ಬಿಡಿಸುವ ಮಹಿಳೆಯರು ಬೆಳಿಗ್ಗೆ 8 ಗಂಟೆಯ ನಂತರ ಏಳುವಂತಾಗಿದೆ.

ವಾಯುವಿಹಾರಕ್ಕೆ ಜನರು ಹೋಗುತ್ತಿಲ್ಲ. ಸಾಮಾನ್ಯವಾಗಿ ಬೆಳಿಗ್ಗೆ 5 ಗಂಟೆಗೆ ನಗರ ಲವಲವಿಕೆಯಿಂದ ಕೂಡಿರುತ್ತಿತ್ತು. ದಿನಪತ್ರಿಕೆ ಹಂಚುವವರು, ಹಾಲು ಹಾಕುವವರು, ತರಕಾರಿ ವ್ಯಾಪಾರಿಗಳು, ಹೂವು ಮಾರುವವರು, ಸಗಟು ವ್ಯಾಪಾರಕ್ಕೆ ತರಕಾರಿ ತರುವ ರೈತರು, ಪೌರ ಕಾರ್ಮಿಕರು ರಸ್ತೆಗಳಲ್ಲಿ ಕಾಣುತ್ತಿದ್ದರು. ಈಗ ಚಳಿಯಿಂದ ಬೆಳಿಗ್ಗೆ 7 ಗಂಟೆವರೆಗೂ ನಗರ ಸ್ತಬ್ಧವಾಗಿರುತ್ತದೆ. ಬೆಳಿಗ್ಗೆ ಹೊರಬಂದರೆ ಮೈಮೇಲೆ ನೀರು ಸುರಿದ ಅನುಭವವಾಗುತ್ತದೆ. ಕೈಕಾಲು ನಡುಗಲು ಆರಂಭವಾಗುತ್ತದೆ. ಚಳಿಯಿಂದ ವಿವಿಧ ಕಾಯಿಲೆಗಳು ಒಕ್ಕರಿಸುತ್ತಿವೆ.

ಶುಕ್ರವಾರ ಬೆಳಿಗ್ಗೆ 6 ಗಂಟೆಗೆ 17 ಡಿಗ್ರಿ ಸೆಲ್ಸಿಯಸ್ ತಾಪಮಾನ ದಾಖಲಾಗಿತ್ತು. ತೇವಾಂಶ ಶೇ 90ರಷ್ಟು ಇತ್ತು. ಗಾಳಿಯ ವೇಗ ಪ್ರತಿ ಗಂಟೆಗೆ 20 ಕಿ.ಮೀ ದಾಖಲಾಗಿತ್ತು. ಬೆಳಿಗ್ಗೆ 8 ಗಂಟೆ ಹೊತ್ತಿಗೆ ಸೂರ್ಯ ಕಾಣಿಸುತ್ತಿದ್ದಂತೆ ಬಿಸಿಯ ಅನುಭವ ಬಂದು ತಾಪಮಾನ 22 ಡಿ.ಸೆ ಗೆ ಏರಿತು. ಗುರುವಾರ ನಸುಕಿನಲ್ಲಿ 18 ಡಿ.ಸೆ ತಾಪಮಾನವಿತ್ತು. ಮುಂದಿನ ಒಂದು ವಾರದವರೆಗೆ ತಂಪಾದ ಹವೆ ಇರುತ್ತದೆ ಎಂದು ಹವಾಮಾನ ತಜ್ಞರು ತಿಳಿಸಿದ್ದಾರೆ.