ವಡಗೇರಾ: ಹೆಲ್ಮೆಟ್ ಮಾರಾಟಗಾರರಿಗೆ ಶುಕ್ರದೆಸೆ

ವಡಗೇರಾ: ಡಿ.1 ರಿಂದ ದ್ವಿಚಕ್ರ ವಾಹನ ಸವಾರರಿಗೆ ಹೆಲ್ಮೆಟ್ ಕಡ್ಡಾಯ ಮಾಡಿದ್ದರಿಂದ ಹೆಲ್ಮೆಟ್‌ಗಳ ಮಾರಾಟ ಜೋರಾಗಿದೆ.

ಈಗಾಗಲೇ ಹೆದ್ದಾರಿ ಬಳಿ ಪೆಟ್ರೂಲ್ ಬಂಕ್ ಸಮೀಪ ಹೆಲ್ಮೆಟ್ ಮಾರಾಟ ಭರ್ಜರಿಯಾಗಿ ನಡೆದಿದೆ. ನೆರೆಯ ತೆಲಂಗಾಣದಿಂದ ಬಂದಿರುವ ವ್ಯಾಪಾರಿಗಳು ಐಎಸ್‌ಐ ಚಿಹ್ನೆಯುಳ್ಳ ಉತ್ತಮ ಗುಣಮಟ್ಟದ ಹೆಲ್ಮೆಟ್‌ಗಳನ್ನು ಮಾರಾಟ ಮಾಡುತ್ತಿದ್ದಾರೆ.

‘ಒಂದು ಹೆಲ್ಮೆಟ್‌ ಬೆಲೆ ₹550–₹600 ಇದೆ. ದಿನಕ್ಕೆ 5–6 ಹೆಲ್ಮೆಟ್‌ಗಳು ಮಾರಾಟವಾಗುತ್ತಿವೆ. ಈ ಭಾಗದಲ್ಲಿ ಚನ್ನಾಗಿ ವ್ಯಾಪಾರವಾಗಬಹುದು ಎಂಬ ಆಶಾಭಾವನೆಯಿಂದ ಸಾವಿರಾರು ರೂಪಾಯಿ ಬಂಡವಾಳ ಹಾಕಲಾಗಿದೆ. ಮುಂಬರುವ ದಿನಗಳಲ್ಲಿ ಇನ್ನೂ ಹೆಚ್ಚಿನ ಹೆಲ್ಮೆಟ್‌ಗಳು ಮಾರಾಟವಾಗಬಹುದು’ ಎಂದು ವ್ಯಾಪಾರಿ ಪ್ರಕಾಶ ವಿಶ್ವಾಸ ವ್ಯಕ್ತಪಡಿಸಿದರು.

ಈಗಾಗಲೇ ಜಿಲ್ಲಾ ಪೊಲೀಸ್ ಇಲಾಖೆ ಮುಂಚಿತವಾಗಿಯೇ ವಾಹನ ಚಾಲಕರಲ್ಲಿ ಜಾಗೃತಿ ಮೂಡಿಸಿದೆ ಹಾಗೂ ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳಲು ಮುಂದಾಗಿದೆ. ಹೆಲ್ಮೆಟ್ ಧರಿಸದೆ ದ್ವಿಚಕ್ರ ವಾಹನ ಚಾಲನೆ ಮಾಡಿದರೆ ₹500 ದಂಡ ವಿಧಿಸಲಾಗುವದು ಎಂಬ ಸಂದೇಶ ಪತ್ರಿಕೆಗಳಲ್ಲಿ ಹಾಗೂ ಸಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದೆ. ಆ ಸಂದೇಶದಲ್ಲಿ ಸುರಕ್ಷಿತ ವಾಹನ ಚಾಲನೆಯ ಜಾಗೃತಿಯನ್ನೂ ಮೂಡಿಸಲಾಗುತ್ತಿದೆ.