ಆ ಬೆಟ್ಟದಲ್ಲಿ, ಪ್ರೀತಿಯಲ್ಲಿ...

ಊರಾಚೆ ಒಂದು ಬೆಟ್ಟ. ಅಲ್ಲೊಂದು ಮಂಟಪ. ಅಲ್ಲಿ ಕುಳಿತುಕೊಳ್ಳುವ ಪ್ರೇಮಿಗಳು ಒಂದಲ್ಲಾ ಒಂದು ರೀತಿ ಬೇರೆಯಾಗುತ್ತಿರುತ್ತಾರೆ. ಅದಕ್ಕೆ ಆ ಬೆಟ್ಟಕ್ಕೆ ಶಾಪಗ್ರಸ್ತ ಬೆಟ್ಟ ಎಂಬ ಹೆಸರು. ಅದಕ್ಕಿರುವ ಶಾಪವನ್ನು ವಿಮೋಚನೆ ಮಾಡುವ ಪ್ರೇಮಿಗಳೇ `ಪ್ರೀತಿಯಿಂದ~ ಚಿತ್ರದ ನಾಯಕ-ನಾಯಕಿ. ಈ ಕತೆಯನ್ನು ನಿರ್ದೇಶಕರು ಎಂದೋ ಎಲ್ಲೋ ಓದಿದ್ದರಂತೆ. ಅದನ್ನೀಗ ಸಿನಿಮಾ ಮಾಡಲು ಹೊರಟಿದ್ದಾರೆ.

ನಿರ್ದೇಶಕ ರಾಜು ಹಲಗೂರು ಈ ಮೊದಲು ಕಿರುತೆರೆಯಲ್ಲಿ ಕೆಲಸ ಮಾಡಿದವರು. ತಮ್ಮ ಬಳಿ ಇರುವ ಹಲವಾರು ಕತೆಗಳನ್ನು ಸಿನಿಮಾ ಮಾಡಬೇಕೆಂದು ಮನಸ್ಸು ಮಾಡಿದ ಅವರಿಗೆ ಎಲ್ಲೋ ಓದಿದ ಎಳೆಯೊಂದು ಕತೆಯಾಗಿ ಹೊಳೆದಿದೆ.

`ಕತೆ ಬಗ್ಗೆ ನನಗೆ ಇನ್ನೂ ಸ್ಪಷ್ಟನೆ ಸಿಕ್ಕಿಲ್ಲ. ಗಂಟೆಗಂಟೆಗೂ ಬದಲಾಗುವ ತಮ್ಮ ಮನಸ್ಸಿನಂತೆ ಕತೆಯೂ ಕೂಡ ಬದಲಾಗುವ ಸಾಧ್ಯತೆ ಇದೆ~ ಎಂದ ಅವರಿಗೆ, ತಮ್ಮ ಈ ಸಿನಿಮಾ ಪ್ರೀತಿಯ ವ್ಯಾಖ್ಯೆಯನ್ನು ತನ್ನದೇ ಆದ ರೀತಿಯಲ್ಲಿ ಕೊಡಲಿದೆ ಎನ್ನುವ ಆತ್ಮವಿಶ್ವಾಸವಂತೂ ಇದೆ.

`ಸಂಬಂಧದಿಂದ ಹುಟ್ಟುವ ಅಮ್ಮ-ಮಗನ ಪ್ರೀತಿ, ಅಪರಿಚಿತ ಹುಡುಗಿ-ಹುಡುಗನ ನಡುವೆ ಹುಟ್ಟುವ ಪ್ರೀತಿ, ಮಾನಸಿಕ ಅಸ್ವಸ್ಥಳೂ ಅಲ್ಲದ ಮಾನಸಿಕ ಸ್ಥಿಮಿತತೆಯೂ ಇಲ್ಲದ ಒಂದು ಹೆಂಗಸಿನ ಪ್ರೀತಿ.. ಹೀಗೆ ಪ್ರೀತಿಯ ವಿವಿಧ ಆಯಾಮಗಳು ಚಿತ್ರದಲ್ಲಿ ಇರಲಿವೆ~ ಎನ್ನುವುದು ನಿರ್ದೇಶಕರ ಅನಿಸಿಕೆ. ಅಂದಹಾಗೆ, ಮಂಡ್ಯ ಜಿಲ್ಲೆಯವರಾದ ತಮಗೆ ಕನ್ನಡ ಸರಿಯಾಗಿ ಮಾತನಾಡಲು ಬರುವುದಿಲ್ಲ ಎನ್ನುವ ಕೊರಗು ಅವರಿಗಿದೆ.

ಕನ್ನಡ ಚೆನ್ನಾಗಿ ಮಾತನಾಡಬಲ್ಲ ಲಕ್ಷ್ಮಿ ಚಂದ್ರಶೇಖರ್ ಬಗ್ಗೆ ನಿರ್ದೇಶಕರು ಪ್ರೀತಿಯಿಂದ ಮಾತನಾಡಿದರು. ಆ ಪ್ರೀತಿಯಲ್ಲಿ ಪುಳಕಿತರಾಗಿದ್ದ ಲಕ್ಷ್ಮೀ ಚಂದ್ರಶೇಖರ್, `ಸಾಧ್ವೀಮಣಿಯ ಪಾತ್ರಗಳನ್ನು ಮಾಡಿ ನನಗೆ ಬೇಸರವಾಗಿದೆ. ಆ ಕಾರಣದಿಂದಲೇ ಗಿರೀಶ ಕಾಸರವಳ್ಳಿ ಅವರು `ಗೃಹಭಂಗ~ದಲ್ಲಿ ನಟಿಸಲು ಕರೆದಾಗ ಹೋಗಿ ಮಾಡಿದೆ. ಈ ಸಿನಿಮಾದಲ್ಲಿಯೂ ತಮ್ಮ ಈ ಮೊದಲಿನ ಇಮೇಜ್ ಮೀರುವ ಪಾತ್ರ ಸಿಕ್ಕಿದೆ~ ಎಂದರು.

ನಾಯಕ ರಾಕೇಶ್‌ಗೆ ಸಿನಿಮಾದ ಕತೆ ಇಷ್ಟವಾಗಿದೆ. ಕತೆಯಲ್ಲಿ ತಾಯಿ-ಮಗನ ಸೆಂಟಿಮೆಂಟನ್ನು ಮೇಳೈಸಿರುವುದು ಮತ್ತಷ್ಟು ಇಷ್ಟವಾಗಿದೆ. `ಇದು ಮಾಮೂಲಿ ಕಾಲೇಜು ಲವ್ ಸ್ಟೋರಿಗಿಂತ ವಿಭಿನ್ನವಾಗಿದೆ. ಕತೆಯನ್ನು ಊಹಿಸಲು ಯಾರಿಗೂ ಸಾಧ್ಯವೇ ಇಲ್ಲ.

ಕೆಲವೊಮ್ಮೆ ನನ್ನದು ಪ್ರಬುದ್ಧ ಪಾತ್ರ ಎನಿಸುತ್ತದೆ. ಕೆಲವೊಮ್ಮೆ ಅಪ್ರಬುದ್ಧ ಎನಿಸುತ್ತದೆ. ಒಟ್ಟಾರೆ ಕತೆ ವಿಶಿಷ್ಟವಾಗಿದೆ~ ಎನ್ನುತ್ತಾರೆ ಅವರು.

ನಾಯಕಿ ಸೋನಿಯಾ ಗೌಡ ಅವರಿಗೆ ಚಿತ್ರದಲ್ಲಿ ವಿವಾಹಿತ ಹುಡುಗಿಯ ಪಾತ್ರ. `ನಿರ್ದೇಶಕರ ನಗು ಮುಖ ನೋಡುತ್ತಾ ಕತೆ ಕೇಳುವುದನ್ನೇ ಮರೆತುಬಿಟ್ಟೆ.

 ನಂತರ ಮತ್ತೊಮ್ಮೆ ಕತೆ ಕೇಳಿ ಒಪ್ಪಿಕೊಂಡೆ~ ಎಂದ ಅವರಿಗೆ, `ರಣ~ ಚಿತ್ರದ ನಂತರ ಪೂರ್ಣಪ್ರಮಾಣದ ನಾಯಕಿಯ ಪಾತ್ರ ಈ ಚಿತ್ರದಲ್ಲಿ ಸಿಕ್ಕಿದೆ. `ಇದೊಂದು ಸವಾಲಿನ ಪಾತ್ರ. ಶೇ 50ರಷ್ಟು ಪ್ರೀತಿ ಮಾಡ್ತೀನಿ. ಇನ್ನರ್ಧ ತ್ಯಾಗ ಮಾಡ್ತೀನಿ~ ಎಂದು ಸೋನಿಯಾ ತಮ್ಮ ಪಾತ್ರವನ್ನು ವಿವರಿಸಿದರು.

ನಿರ್ಮಾಪಕರಲ್ಲಿ ಒಬ್ಬರಾದ ಅರುಣ್‌ಕುಮಾರ್ ವೃತ್ತಿಯಲ್ಲಿ ಎಂಜಿನಿಯರ್. ರಾಜು ಅವರ ಕತೆ ಇಷ್ಟವಾದ ಕಾರಣ ತಮ್ಮ ಗೆಳೆಯರೊಂದಿಗೆ ಸೇರಿ ಚಿತ್ರ ನಿರ್ಮಿಸುವ ಮನಸ್ಸು ಮಾಡಿದ್ದಾರೆ. ಬೆಂಗಳೂರು, ಮುತ್ತತ್ತಿ. ಮಹದೇಶ್ವರ ಬೆಟ್ಟ, ಸಕಲೇಶಪುರದಲ್ಲಿ ಚಿತ್ರೀಕರಣ ನಡೆಯಲಿದೆ.