ನಾಗಚೈತನ್ಯ– ಶೋಭಿತಾ ಅದ್ಧೂರಿ ವಿವಾಹ: ಚಿತ್ರಗಳನ್ನು ಹಂಚಿಕೊಂಡ ತಂದೆ ನಾಗಾರ್ಜುನ

ನವದೆಹಲಿ: ಹೈದರಾಬಾದ್‌ನಲ್ಲಿ ನಟ ನಾಗಚೈತನ್ಯ ಮತ್ತು ಶೋಭಿತಾ ಧೂಲಿಪಾಲ ಅವರ ವಿವಾಹ ಅದ್ದೂರಿಯಾಗಿ ಬುಧವಾರ ಜರುಗಿತು.

ನಾಗಚೈತನ್ಯ ಅವರ ಕುಟುಂಬದ ಅನ್ನಪೂರ್ಣ ಸ್ಟೂಡಿಯೋಸ್‌ನಲ್ಲಿ ಮದುವೆ ಕಾರ್ಯಗಳು ನಡೆದವು. 

ಈ ಕುರಿತು ನಾಗಾರ್ಜುನ ಅಕ್ಕಿನೇನಿ ಅವರು ಸಾಮಾಜಿಕ ಮಾಧ್ಯಮ ಎಕ್ಸ್‌ನಲ್ಲಿ ಪೋಟೊಗಳನ್ನು ಹಂಚಿಕೊಂಡು ನವದಂಪತಿಗೆ ಶುಭಹಾರೈಸಿದ್ದಾರೆ.

‘ಶೋಭಿತಾ ಮತ್ತು ಚೈ ಅವರು ಹೊಸ ಅಧ್ಯಾಯ ಆರಂಭಿಸುತ್ತಿರುವುದು ನನ್ನ ಪಾಲಿಗೆ ವಿಶೇಷ ಮತ್ತು ಭಾವನಾತ್ಮಕ ಸಂದರ್ಭವಾಗಿದೆ. ಇಬ್ಬರಿಗೂ ಅಭಿನಂದನೆಗಳು. ಶೋಭಿತಾಗೆ ನಮ್ಮ ಕುಟುಂಬಕ್ಕೆ ಆತ್ಮೀಯ ಸ್ವಾಗತ. ಈಗಾಗಲೇ ನಮ್ಮ ಜೀವನದಲ್ಲಿ ಸಾಕಷ್ಟು ಖುಷಿಯನ್ನು ತುಂಬಿದ್ದೀರಿ’ ಎಂದು ಬರೆದುಕೊಂಡಿದ್ದಾರೆ.

ನಾಗಚೈತನ್ಯ ಮತ್ತು ಶೋಭಿತಾ 2022ರಿಂದ ಡೇಟಿಂಗ್ ಮಾಡುತ್ತಿದ್ದರು ಎನ್ನುವ ಊಹಾಪೋಹಗಳ ನಡುವೆ, ಕಳೆದ ಆಗಸ್ಟ್‌ನಲ್ಲಿ  ನಿಶ್ಚಿತಾರ್ಥ ಮಾಡಿಕೊಂಡಿದ್ದರು.