ಪಾನ್ ಮಸಾಲಾ ಬ್ರ್ಯಾಂಡ್‌ ಜಾಹೀರಾತಿನಿಂದ ಹಿಂದೆ ಸರಿದ ನಟ ಅಮಿತಾಭ್‌
ಮುಂಬೈ: ಪಾನ್ ಮಸಾಲಾ ಬ್ರ್ಯಾಂಡ್‌ ಜಾಹೀರಾತು ಪ್ರಚಾರದಿಂದ ಪ್ರಸಿದ್ಧ ನಟ ಅಮಿತಾಭ್‌ ಬಚ್ಚನ್ ಅವರು ಹಿಂದೆ ಸರಿದಿದ್ದಾರೆ.
ಪ್ರಚಾರಕ್ಕಾಗಿ ತಾವು ಪಡೆದಿದ್ದ ಹಣವನ್ನು ಹಿಂತಿರುಗಿಸಿರುವುದಾಗಿಯೂ ಅವರು ಹೇಳಿದ್ದಾರೆ.
ಪಾನ್ ಮಸಾಲಾ ಬ್ರ್ಯಾಂಡ್‌ನ ಜಾಹೀರಾತಿನಲ್ಲಿ ಕಾಣಿಸಿಕೊಂಡಿದ್ದಕ್ಕಾಗಿ ನಟ ಅಮಿತಾಭ್‌ (79) ಅವರು ಟೀಕೆಗಳನ್ನು ಎದುರಿಸಿದ್ದರು. ನಟನ ಈ ನಿರ್ಧಾರದ ಬಗ್ಗೆ ಅವರ ಹಲವು ಅಭಿಮಾನಿಗಳು ಅಸಮಾಧಾನ ವ್ಯಕ್ತಪಡಿಸಿದ್ದರು.
‘ಅಮಿತಾಭ್‌ ಅವರು ಇನ್ನು ಮುಂದೆ ಪಾನ್‌ಮಸಾಲಾ ಪ್ರಚಾರದಲ್ಲಿ ಭಾಗಿಯಾಗುವುದಿಲ್ಲ’ ಎಂದು ಅವರ ಕಚೇರಿಯ ಬ್ಲಾಗ್‌ ಪೋಸ್ಟ್‌ವೊಂದು ಭಾನುವಾರ ರಾತ್ರಿ ತಿಳಿಸಿದೆ.
‘ಉತ್ಪನ್ನದ ಜಾಹೀರಾತು ಪ್ರಸಾರವಾದ ಕೆಲವು ದಿನಗಳ ನಂತರ ಕಳೆದ ವಾರ ಅಮಿತಾಭ್‌ ಅವರು ಬ್ರ್ಯಾಂಡ್‌ ಅಧಿಕಾರಿಗಳನ್ನು ಸಂಪರ್ಕಿಸಿ ಅದರಿಂದ ಹೊರ ಬಂದಿದ್ದಾರೆ. ಅವರು ಜಾಹೀರಾತಿನ ಪ್ರತಿನಿಧಿಯಾಗಿರುವ ಬಗ್ಗೆ ಅವರಿಗೆ ಮಾಹಿತಿ ಇರಲಿಲ್ಲ. ಇದರಿಂದ ಟೀಕೆಗಳು ವ್ಯಕ್ತವಾದ ಮೇಲೆ ಅವರು ಈ ಹಠಾತ್‌ ನಿರ್ಧಾರ ಕೈಗೊಂಡಿದ್ದಾರೆ’ ಎಂದು ಪೋಸ್ಟ್‌ನಲ್ಲಿ ಹೇಳಲಾಗಿದೆ.
ಪಾನ್ ಮಸಾಲಾ ಬ್ರ್ಯಾಂಡ್‌ಗಳನ್ನು ಉತ್ತೇಜಿಸುವ ಜಾಹೀರಾತುಗಳಲ್ಲಿ ಅಮಿತಾಭ್‌ ಬಚ್ಚನ್ ಅವರು ಭಾಗಿಯಾಗಬಾರದು ಎಂದು ರಾಷ್ಟ್ರೀಯ ತಂಬಾಕು ನಿರ್ಮೂಲನೆ ಸಂಸ್ಥೆ (ಎನ್‌ಒಟಿಇ) ಅಧ್ಯಕ್ಷ ಡಾ.ಶೇಖರ್‌ ಸಲ್ಕರ್‌ ಅವರು ಕಳೆದ ತಿಂಗಳು ಪತ್ರವೊಂದರಲ್ಲಿ ಮನವಿ ಮಾಡಿದ್ದರು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.