ದೀಪಿಕಾ ಪಡುಕೋಣೆ ಪಾಲಿಗೆ ‘ಸೂಪರ್‌ ಡ್ರಗ್‌’ ಅಂದ್ರೆ ಯಾರು ಗೊತ್ತೇ?
ನಟಿ ದೀಪಿಕಾ ಪಡುಕೋಣೆ ಮತ್ತು ಆಕೆಯ ಮ್ಯಾನೇಜರ್‌ ಕರೀಷ್ಮಾ ಪ್ರಕಾಶ್‌ ನಡುವೆ ಡ್ರಗ್ಸ್ ಪೂರೈಕೆ ಸಂಬಂಧ ನಡೆದಿರುವ ವಾಟ್ಸ್‌ಆ್ಯಪ್‌ ಸಂದೇಶ ವಿನಿಮಯ ಸಾಮಾಜಿಕ ಜಾಲತಾಣದಲ್ಲಿ ವೈರಲ್‌ ಆಗಿದೆ. ಡ್ರಗ್ಸ್ ಜಾಲದ ಬೇರುಗಳು ಡಿಪ್ಪಿಯ ಮನೆ ಅಂಗಳ ಪ್ರವೇಶಿಸಿರುವ ಬಗ್ಗೆ ಬಿಸಿ ಚರ್ಚೆಯೂ ಶುರುವಾಗಿದೆ.
ಈಗಾಗಲೇ, ವಿಚಾರಣೆಗೆ ಹಾಜರಾಗುವಂತೆ ಮಾದಕ ವಸ್ತು ನಿಯಂತ್ರಣ ಸಂಸ್ಥೆ(ಎನ್‌ಸಿಬಿ)ಯು ಕರೀಷ್ಮಾಗೆ ನೋಟಿಸ್‌ ಕೂಡ ಜಾರಿಗೊಳಿಸಿದೆ. ಈಗ ಎಲ್ಲರ ಬಾಯಲ್ಲೂ ಬಾಲಿವುಡ್‌ನಲ್ಲಿ ಆಳವಾಗಿ ಬೇರೂರಿರುವ ಡ್ರಗ್ಸ್ ಜಾಲದ ಬಗ್ಗೆಯೇ ಚರ್ಚೆ.
ಈ ನಡುವೆಯೇ ದೀಪಿಕಾ ಪಡುಕೋಣೆಯು ತನ್ನ ಇನ್‌ಸ್ಟಾಗ್ರಾಮ್‌ನಲ್ಲಿ ಹಂಚಿಕೊಂಡಿರುವ ಹಳೆಯ ಪೋಸ್ಟ್‌ವೊಂದು ಈಗ ಸದ್ದು ಮಾಡುತ್ತಿದೆ. ಡಿಪ್ಪಿಯು ತನ್ನ ಪತಿ ರಣವೀರ್‌ ಸಿಂಗ್ ಅವರನ್ನು ‘ಸೂಪರ್‌ ಡ್ರಗ್‌’ ಎಂದು ಕರೆದಿರುವುದು ಚರ್ಚೆಗೆ ಗ್ರಾಸವಾಗಿದೆ.
ಅಂದಹಾಗೆ 2019ರಲ್ಲಿ ರಣವೀರ್‌ ಸಿಂಗ್ ಟೀ ಶರ್ಟ್ ಧರಿಸಿರುವ ಫೋಟೊವೊಂದನ್ನು ದೀಪಿಕಾ ಇನ್‌ಸ್ಟಾಗ್ರಾಮ್‌ ಖಾತೆಯಲ್ಲಿ ಹಂಚಿಕೊಂಡಿದ್ದರು. ಈ ಟೀ ಶರ್ಟ್ ಮೇಲೆ ‘ಲವ್‌ ಈಸ್‌ ಎ ಸೂಪರ್‌ ಪವರ್‌’ ಎಂದು ಬರೆಯಲಾಗಿತ್ತು. ಇದಕ್ಕೆ ಡಿಪ್ಪಿಯು, ‘...ಮತ್ತು ನೀನು ನನ್ನ ಸೂಪರ್‌ ಡ್ರಗ್‌’ ಎಂದು ಶೀರ್ಷಿಕೆ ನೀಡಿದ್ದಾರೆ.
ದೀಪಿಕಾ ಮತ್ತು ಕರೀಷ್ಮಾ ನಡುವಿನ ಸಂದೇಶ ವಿನಿಮಯದಲ್ಲಿ ‘ಕೊಕೊ’ ಎಂಬ ಪದ ಬಳಕೆಯಾಗಿದೆ. ಕೊಕೊ ಎಂಬುದು ಮುಂಬೈನ ಕಮಲಾ ಮಿಲ್‌ ಪ್ರದೇಶದಲ್ಲಿ ಇರುವ ಐಷಾರಾಮಿ ರೆಸ್ಟೋರೆಂಟ್‌ನ ಹೆಸರು. ಬಿಟೌನ್‌ ತಾರೆಯರು ಭೇಟಿ ನೀಡುವ ಅಚ್ಚುಮೆಚ್ಚಿನ ತಾಣ ಇದು. ಈ ರೆಸ್ಟೋರೆಂಟ್‌ಗೆ ದೀಪಿಕಾ ಪಡುಕೋಣೆ ಎಷ್ಟು ಭಾರಿ ಭೇಟಿ ನೀಡಿದ್ದಾರೆ ಎಂಬ ಬಗ್ಗೆಯೂ ಅಂತರ್ಜಾಲ ತಾಣದಲ್ಲಿ ನೆಟ್ಟಿಗರು ಹುಡುಕಾಟದಲ್ಲಿ ಮುಳುಗಿದ್ದಾರೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.