ತಮಿಳಿನ ಖ್ಯಾತನಟ ಧನುಷ್ ಅಭಿನಯದ ‘ದಿ ಎಕ್ಸ್ಟಾರ್ಡಿನರಿ ಜರ್ನಿ ಆಫ್ ದಿ ಫಕೀರ್’ ಇಂಗ್ಲಿಷ್ ಸಿನಿಮಾ ಜೂನ್ 21ಕ್ಕೆ ತೆರೆಗೆ ಬರಲು ಸಿದ್ದವಾಗಿದೆ. ಈಚೆಗಷ್ಟೇ ಮುಂಬೈನಲ್ಲಿ ಚಿತ್ರದ ಟ್ರೇಲರ್ ಬಿಡುಗಡೆ ಮಾಡಿದ್ದ ಧನುಷ್ ಇದೇ ಸಂದರ್ಭದಲ್ಲಿ ಮತ್ತೊಂದು ಸಂತಸದ ಸುದ್ದಿಯನ್ನೂ ಪ್ರಕಟಿಸಿದ್ದಾರೆ.
ಧನುಷ್ ಮೂರನೇ ಹಿಂದಿ ಚಿತ್ರದಲ್ಲಿ ಅಭಿನಯಿಸುತ್ತಿರುವುದಾಗಿ ಹೇಳಿಕೊಂಡಿದ್ದಾರೆ. ಸೋನಂಕಪೂರ್ಗೆ ಜೋಡಿಯಾಗಿ ನಟಿಸಿದ್ದ ಧನುಷ್ ಅವರ ಮೊದಲ ಹಿಂದಿ ಚಿತ್ರ ‘ರಾಂಜಣ’ ಯಶಸ್ಸು ಗಳಿಸಿತ್ತು. ಈ ಸಿನಿಮಾ ಜೂನ್ 21ರಂದು ತೆರೆ ಕಂಡಿತ್ತು. ತಮಾಷೆಯೆಂದರೆ ಧನುಷ್ ಅವರ ಮೊದಲ ಹಾಲಿವುಡ್ ಸಿನಿಮಾ ಕೂಡಾ ಜೂನ್ 21ರಂದೇ ತೆರೆ ಕಾಣುತ್ತಿದೆ. ಈ ನಡುವೆ ಧನುಷ್ ತಮ್ಮ ಮಗ ಜೂನ್ 21ರಂದು ಜನಿಸಿರುವುದಾಗಿ ಹೇಳಿಕೊಂಡಿದ್ದಾರೆ. ಒಟ್ಟಿನಲ್ಲಿ ಧನುಷ್ ಪಾಲಿಗೆ ಜೂನ್ 21 ಅದೃಷ್ಟದ ದಿನವೆನ್ನಲು ಅಡ್ಡಿಯಿಲ್ಲ.
‘ಶಮಿತಾಭ್’ ಹಿಂದಿ ಸಿನಿಮಾದ ನಂತರ ಧನುಷ್ ಯಾವುದೇ ಹಿಂದಿ ಸಿನಿಮಾ ಒಪ್ಪಿಕೊಂಡಿರಲಿಲ್ಲ. ಕಾರಣ ಕೇಳಿದರೆ ಉತ್ತಮ ಚಿತ್ರಕತೆಯುಳ್ಳ ಸ್ಕ್ರಿಪ್ಟ್ ತಮ್ಮ ಬಳಿ ಬರಲಿಲ್ಲ ಅನ್ನುತ್ತಾರೆ ಅವರು. ಇಷ್ಟರಲ್ಲೇ ನಾನು ಮತ್ತೊಂದು ಹಿಂದಿ ಸಿನಿಮಾ ಮಾಡಲಿದ್ದೇನೆ ಎಂದೂ ಧನುಷ್ ತಣ್ಣಗೆ ಉತ್ತರಿಸುತ್ತಾರೆ. ಉತ್ತಮ ಸ್ಕ್ರಿಪ್ಟ್ಗಾಗಿ ಕಾದಿದ್ದು ಒಳ್ಳೆಯದೇ ಆಯಿತು ಅನ್ನೋದು ಅವರ ಮಾತು.
ಧನುಷ್ ಸದ್ಯಕ್ಕೆ ವೇಟ್ರಿ ಮಾರನ್ ಅವರ ‘ಅಸುರನ್’ ಸಿನಿಮಾದಲ್ಲಿ ಅಭಿನಯಿಸುತ್ತಿದ್ದಾರೆ. ತಮ್ಮ ಮೂರನೇ ಹಿಂದಿ ಚಿತ್ರವನ್ನು ಯಾರು ನಿರ್ದೇಶಸಲಿದ್ದಾರೆ? ನಾಯಕಿ ಯಾರು? ಚಿತ್ರದ ಕಥೆಯೇನು? ಎನ್ನುವ ಬಗ್ಗೆ ಧನುಷ್ ಇದುವರೆಗೆ ಗುಟ್ಟು ಬಿಟ್ಟುಕೊಟ್ಟಿಲ್ಲ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.