ಆ್ಯಕ್ಷನ್ ಕಟ್‌ಗೆ ಸಜ್ಜಾದ ಮೋಹನ್ಲಾಲ್
ನಾಲ್ಕು ದಶಕಗಳಿಂದ ನಟನೆ ಮೂಲಕ ಮಲಯಾಳ ಪ್ರೇಕ್ಷಕರನ್ನು ಮೋಡಿ ಮಾಡಿರುವ ನಟ ಮೋಹನ್ಲಾಲ್ ಅವರು ಮೊದಲ ಬಾರಿಗೆ ಆ್ಯಕ್ಷನ್ ಕಟ್ ಹೇಳಲು ಸಜ್ಜಾಗಿದ್ದಾರೆ.
ನಿರ್ದೇಶಕನಾಗುವ ತಮ್ಮ ಮನದ ಇಂಗಿತವನ್ನು ಅವರೇ ಬ್ಲಾಗ್ ಬರಹದ ಮೂಲಕ ತೋಡಿಕೊಂಡಿದ್ದಾರೆ. ‘ಇದುವರೆಗೆ ಮಾಡದ ಕಾರ್ಯವನ್ನು ಮಾಡಲು ನನ್ನ ಮನಸ್ಸು ಆಶಿಸುತ್ತಿದೆ. ನಾನೊಂದು ಸಿನಿಮಾ ನಿರ್ದೇಶನ ಮಾಡಲಿದ್ದೇನೆ’ ಎಂದು ಬ್ಲಾಗ್‌ನಲ್ಲಿ ಇಂಗಿತ ವ್ಯಕ್ತಪಡಿಸಿದ್ದಾರೆ.
‘ಇಲ್ಲಿಯವರೆಗೆ ತೆರೆಯಲ್ಲಿ ಕಾಣಿಸಿಕೊಂಡಿದ್ದ ನಾನು ತೆರೆಯ ಹಿಂದೆ ಕೆಲಸ ಮಾಡಲು ಬಯಸುತ್ತೇನೆ. ನಾನು ‘ಬಾರೋಸ್’ ಹೆಸರಿನ ಬಿಗ್‌ ಬಜೆಟ್‌ ಥ್ರೀಡಿ ಚಿತ್ರ ನಿರ್ದೇಶಿಸಲಿದ್ದೇನೆ’ ಎಂದೂ ಚಿತ್ರದ ಹೆಸರನ್ನೂ ಬಹಿರಂಗಪಡಿಸಿದ್ದಾರೆ.
ಮಕ್ಕಳು ಮತ್ತು ಹಿರಿಯರಿಗೆ ಇಷ್ಟವಾಗುವಂತೆ ಮೋಹನ್ಲಾಲ್ ಈ ಸಿನಿಮಾ ನಿರ್ದೇಶಿಸಲಿದ್ದಾರಂತೆ. ಗೋವಾದಲ್ಲಿ ಸಿನಿಮಾದ ಶೂಟಿಂಗ್‌ ನಡೆಸಲು ಅವರು ಯೋಜನೆ ರೂಪಿಸಿದ್ದಾರೆ.
ಮೋಹನ್ಲಾಲ್ ಅವರ ಈ ಘೋಷಣೆ ಅವರ ಅಭಿಮಾನಿಗಳಲ್ಲಿ ಪುಳಕ ಉಂಟು ಮಾಡಿದೆ. ಈಗಲೂ ಹಿಟ್ ಸಿನಿಮಾಗಳನ್ನು ನೀಡುತ್ತಿರುವ ಅವರ ನಿರ್ದೇಶನದಲ್ಲಿ ಮೂಡಿಬರುವ ಸಿನಿಮಾ ಹೇಗಿರಬಹುದು ಎಂಬ ಕುತೂಹಲ ಮಾಲಿವುಡ್‌ ಸಿನಿಮಾ ಪ್ರೇಕ್ಷಕರದ್ದು.
ವಾಸ್ಕೋಡಿಗಾಮನ ಸಂಪತ್ತಿನ ಕಾವಲುಗಾರನಾದ ಬಾರೋಸ್‌ನ ಕಥೆ ಇದು. ಪೋರ್ಚುಗೀಸ್‌ ಕಾಲದ ಕಥಾಹಂದರ ಹೊಂದಿದೆ. ಹಾಗಾಗಿ, ಆ ಕಾಲದ ಸೆಟ್‌ ಹಾಕಲು ನಿರ್ಧರಿಸಲಾಗಿದೆ. ಬಾರೋಸ್ ಪಾತ್ರದಲ್ಲಿ ಮೋಹನ್ಲಾಲ್ ಅವರೇ ನಟಿಸಲಿದ್ದಾರೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.