‘ಅಪ್ಪು’ ಸಿನಿಮಾ ಶೀರ್ಷಿಕೆಗಳಲ್ಲೇ ಮೂಡಿ ಬಂದ ‘ಪವರಿಸಂ’

ನಟ ದಿವಂಗತ ಪುನೀತ್‌ ರಾಜ್‌ಕುಮಾರ್‌ ಅವರ ಜನ್ಮದಿನವನ್ನು, ನೋವಿನಲ್ಲೂ ಅದ್ಧೂರಿಯಾಗಿ ಆಚರಿಸಲು ಅಭಿಮಾನಿಗಳು ಸಿದ್ಧತೆ ಆರಂಭಿಸಿದ್ದಾರೆ. ನಿರ್ದೇಶಕ ಪವನ್‌ ಒಡೆಯರ್‌ ಕೂಡಾ ಒಬ್ಬ ಅಭಿಮಾನಿಯಾಗಿ ಪುನೀತ್‌ ಅವರ ಕುರಿತು ‘ಪವರಿಸಂ–ಡ್ಯಾನ್ಸ್‌ ವಿದ್‌ ಅಪ್ಪು’ ಎಂಬ ಹಾಡೊಂದನ್ನು ಬರೆದಿದ್ದಾರೆ. ಎಂಆರ್‌ಟಿ ಮ್ಯೂಸಿಕ್‌ ಯುಟ್ಯೂಬ್‌ ಚಾನೆಲ್‌ನಲ್ಲಿ ಈ ಹಾಡು ಬಿಡುಗಡೆಯಾಗಿದೆ.

‘ಆಕಾಶ’ದಿ ‘ಅಭಿ’ಯಾಗಿ ಕನ್ನಡ ‘ಪೃಥ್ವಿ’ಗೆ ನೀ ‘ಅರಸು’ ಎಂದು ಆರಂಭವಾಗುವ ಈ ಹಾಡಿನಲ್ಲಿ, ‘ಪ್ರೇಮದ ಕಾಣಿಕೆ’ಯಿಂದ ಹಿಡಿದು ‘ಲಕ್ಕಿ ಮ್ಯಾನ್‌’ ಸಿನಿಮಾದವರೆಗೆ ಪುನೀತ್‌ ರಾಜ್‌ಕುಮಾರ್‌ ಅವರು ನಟಿಸಿದ ಎಲ್ಲ ಸಿನಿಮಾಗಳ ಶೀರ್ಷಿಕೆ ಇದೆ. ಶೀರ್ಷಿಕೆಯನ್ನೇ ಬಳಸಿಕೊಂಡು ಹಾಡಿನ ಸಾಹಿತ್ಯ ರಚಿಸಿರುವುದು ಇಲ್ಲಿನ ವಿಶೇಷ. ತಮ್ಮ ಆಕರ್ಷಕ ಡ್ಯಾನ್ಸ್‌ ಮೂಲಕ ಪುನೀತ್‌ ಈ ಹಾಡಿನಲ್ಲಿ ಮತ್ತೆ ಜೀವಿಸಿದ್ದಾರೆ. ನೆಚ್ಚಿನ ಅಪ್ಪುವನ್ನು ಕಂಡು ಅಭಿಮಾನಿಗಳು ಭಾವುಕರಾಗಿದ್ದಾರೆ. ಹಾಡನ್ನು ವೀಕ್ಷಿಸಿ ಸಾಮಾಜಿಕ ಜಾಲತಾಣಗಳಲ್ಲಿ ತಮ್ಮ ಭಾವನೆಗಳನ್ನು ವ್ಯಕ್ತಪಡಿಸಿದ್ದಾರೆ.

‘ಆರು ತಿಂಗಳ ಮಗುವಾಗಿದ್ದಾಗಲೇ ಅಪ್ಪು ಅವರು ತೆರೆಯ ಮೇಲೆ ಕಾಣಿಸಿಕೊಂಡಿದ್ದರು. ನಾನು ಒಬ್ಬ ನಿರ್ದೇಶಕನಾಗಿ, ಚಿತ್ರಸಾಹಿತಿಯಾಗಿ ಈ ಹಾಡನ್ನು ಬರೆದಿಲ್ಲ. ಅಪ್ಪು ಅವರ ಅಭಿಮಾನಿಯಾಗಿ ನಾನು ಈ ಹಾಡನ್ನು ಬರೆದಿದ್ದೇನೆ. ಅವರು ಕಿಂಗ್‌ ಆಫ್‌ ದಿ ಸಿನಿಮಾ’ ಎನ್ನುತ್ತಾರೆ ಪವನ್‌.

ಲಿಂಕ್‌:

https://www.youtube.com/watch?v=lERwdcEULRw