ಸಂಬಂಧ ಸುರಕ್ಷಿತವಾಗಿದೆ: ವಿವಾಹದ ಬಗೆಗಿನ ಆರೋಪದ ಕುರಿತು ಪ್ರಿಯಾಮಣಿ ಹೇಳಿಕೆ

ಪತಿ ಮುಸ್ತಫಾ ರಾಜಾ ಜೊತೆಗಿನ ವಿವಾಹದ ಬಗ್ಗೆ ಕೇಳಿಬಂದಿರುವ ಆರೋಪದ ಕುರಿತು ನಟಿ ಪ್ರಿಯಾಮಣಿ ಸ್ಪಷ್ಟನೆ ನೀಡಿದ್ದಾರೆ.

'ಪ್ರಿಯಾಮಣಿ ಜೊತೆಗಿನ ಮುಸ್ತಫಾ ವಿವಾಹವು ಅಸಿಂಧುವಾಗಿದೆ. ಕಾರಣ, ಮುಸ್ತಫಾ ನನಗೆ ವಿಚ್ಛೇದನವನ್ನೇ ನೀಡಿಲ್ಲ' ಎಂದು ಅವರ ಮೊದಲ ಪತ್ನಿ ಆಯೆಷಾ ಆರೋಪಿಸಿದ್ದರು.

ಈ ಕುರಿತು 'ಬಾಲಿವುಡ್‌ ಹಂಗಾಮಾ' ಚಾನೆಲ್‌ಗೆ ನೀಡಿದ ಸಂದರ್ಶನದಲ್ಲಿ ಪ್ರಿಯಾಮಣಿ ಮಾತನಾಡಿದ್ದಾರೆ.

'ಪತಿ ಮುಸ್ತಫಾ ವಿದೇಶದಲ್ಲಿ ಇದ್ದರೂ ಸಹ ನಾವು ಪ್ರತಿದಿನವೂ ಸಂಪರ್ಕದಲ್ಲಿದ್ದೇವೆ. ಸಂಬಂಧಗಳಲ್ಲಿ ಸಂವಹನವೇ ಮುಖ್ಯವೆಂದು ನಾನು ನಂಬಿದ್ದೇನೆ. ನಮ್ಮ ಸಂಬಂಧದಲ್ಲಿ ನಾವು ಖಂಡಿತವಾಗಿಯೂ ಸುರಕ್ಷಿತರಾಗಿದ್ದೇವೆ. ಇದೀಗ ಮುಸ್ತಫಾ ಅಮೆರಿಕದಲ್ಲಿದ್ದಾರೆ. ಅಲ್ಲಿ ಕೆಲಸ ಮಾಡುತ್ತಿದ್ದಾರೆ. ನಾವು ಪ್ರತಿದಿನ ಮಾತಾಡುತ್ತೇವೆ' ಎಂದು ತಿಳಿಸಿದ್ದಾರೆ.

2013ರಲ್ಲಿ ಮೊದಲ ಪತ್ನಿ ಆಯೆಷಾರಿಂದ ದೂರವಾದ ಮುಸ್ತಫಾ 2017ರಲ್ಲಿ ನಟಿ ಪ್ರಿಯಾಮಣಿ ಅವರನ್ನು ವಿವಾಹವಾಗಿದ್ದಾರೆ.