ಸಂಭಾವನೆಯಲ್ಲಿ ವಿನಾಯಿತಿ ನೀಡಿದ ರಕುಲ್
ದಕ್ಷಿಣ ಭಾರತದ ಖ್ಯಾತಿ ನಟಿ ರಕುಲ್ ಪ್ರೀತ್ ಸಿಂಗ್ ತಮ್ಮ ಸಂಭಾವನೆಯಲ್ಲಿ ಶೇ 50ರಷ್ಟು ವಿನಾಯಿತಿ ನೀಡಿದ್ದಾರೆ ಎಂಬ ಸುದ್ದಿ ಟಾಲಿವುಡ್ ಅಂಗಳದಲ್ಲಿ ಹರಿದಾಡುತ್ತಿದೆ. ಚಂದ್ರಶೇಖರ ಯಲೆಟ್ಟಿ ನಿರ್ದೇಶನದ ತಮ್ಮ ಮುಂದಿನ ಚಿತ್ರಕ್ಕೆ ರಕುಲ್ ಸಂಭಾವನೆಯಲ್ಲಿ ವಿನಾಯಿತಿ ನೀಡಿದ್ದಾರಂತೆ. ಈ ಚಿತ್ರದಲ್ಲಿ ನಿತಿನ್ ನಾಯಕನಾಗಿ ನಟಿಸುತ್ತಿದ್ದಾರೆ.
ಮೂಲಗಳ ಪ್ರಕಾರ ಲಾಕ್‌ಡೌನ್‌ಗೂ ಮೊದಲು ರಕುಲ್ ಸಿನಿಮಾವೊಂದಕ್ಕೆ ₹ 1.5 ಕೋಟಿ ಸಂಭಾವನೆ ಪಡೆಯುತ್ತಿದ್ದರು. ಆದರೆ ಸಿನಿ ಉದ್ಯಮದ ಸದ್ಯದ ಪರಿಸ್ಥಿತಿಯನ್ನು ಪರಿಗಣಿಸಿ ತಮ್ಮ ನಿರ್ಮಾಪಕರ ಪರವಾಗಿ ನಿಂತ ಮೊದಲ ಸ್ಟಾರ್ ನಟಿ ರಕುಲ್.
ಇಲ್ಲಿಯವರೆಗೆ ಸಿನಿಮಾರಂಗದಿಂದ ಯಾವುದೇ ನಟ–ನಟಿಯರು ಸಂಭಾವನೆಯಲ್ಲಿ ವಿನಾಯಿತಿ ಮಾಡುವುದಾಗಿ ಬಹಿರಂಗವಾಗಿ ಎಲ್ಲಿಯೂ ಹೇಳಿಕೆ ನೀಡಿಲ್ಲ. ಆ ಕಾರಣಕ್ಕೆ ರಕುಲ್ ಉಳಿದ ನಟ–ನಟಿಯರಿಗೆ ಮಾದರಿಯಾಗಿದ್ದಾರೆ.
ಕೊರೊನಾ ಸೋಂಕು ಎಲ್ಲ ಉದ್ಯಮವನ್ನು ಬುಡಮೇಲು ಮಾಡಿದೆ. ಅದಕ್ಕೆ ಸಿನಿಮಾ ಕ್ಷೇತ್ರವೂ ಹೊರತಾಗಿಲ್ಲ. ಆ ಕಾರಣಕ್ಕೆ ದೊಡ್ಡದು ಸಣ್ಣದು ಎಂದು ಲೆಕ್ಕಿಸದೆ ಎಲ್ಲದರಲ್ಲೂ ರಾಜಿ ಹಾಗೂ ಹೊಂದಾಣಿಕೆ ಮಾಡಿಕೊಳ್ಳಲು ಹೇಳಲಾಗುತ್ತಿದೆ ಎನ್ನಲಾಗುತ್ತಿದೆ.
ಕೊರೊನಾ ಬಿಕ್ಕಟ್ಟಿನ ಈ ಸಂದರ್ಭದಲ್ಲಿ ಅನೇಕ ಸಿನಿತಂಡಗಳು ಸಂಬಳವಿಲ್ಲದೇ ನಿರುದ್ಯೋಗಿಗಳಾಗಿವೆ. ಇದಕ್ಕೆ ದೊಡ್ಡ ಬಜೆಟ್ ಸಿನಿಮಾಗಳು ಹೊರತಾಗಿಲ್ಲ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.