ವಿಡಿಯೊ | 96 ಟೂ 55 ಸಾರಾ ಫಿಟ್‌ನೆಸ್‌ ಜರ್ನಿ
ಬಾಲ್ಯದಲ್ಲಿಬೆಣ್ಣೆ ಮುದ್ದೆ, ಗುಂಡಮ್ಮನಂತೆ ಇದ್ದ ಸಾರಾ ಅಲಿ ಖಾನ್ ಇಂದು ಬಾಲಿವುಡ್‌ನ ಹಾಟ್‌ ಹುಡುಗಿ. ಪುಟ್ಟ ನಡು, ಬಿಸುಪಿನ ದೇಹಾಕಾರ, ಚೂಪಾದ ಮುಖ... ಸಿನಿಮೋದ್ಯಮಕ್ಕೆ ಬೇಕಾದಂತೆ ತನ್ನ ದೇಹವನ್ನು ತಿದ್ದಿ, ತೀಡಿ ಹದಕ್ಕೆ ತಂದ ಅವರ ಶ್ರಮ ಕಡಿಮೆಯೇನಲ್ಲ. ತಮ್ಮ ಈ ಸುದೀರ್ಘ ಫಿಟ್‌ನೆಸ್‌ಪಯಣದ ಬಗ್ಗೆ ಇನ್‌ಸ್ಟಾಗ್ರಾಂನಲ್ಲಿ ವಿಡಿಯೊ ಹಂಚಿಕೊಂಡಿದ್ದಾರೆ.
96 ಕೆ.ಜಿ ತೂಕ ಇದ್ದ ಸಾರಾ 55 ಕೆ.ಜಿ ತೂಕಕ್ಕೆ ತಮ್ಮ ದೇಹವನ್ನು ತಂದುಕೊಂಡಿದ್ದು ಹೇಗೆ? ಇದಕ್ಕೆತಾವೆಷ್ಟು ವರ್ಕ್‌ಔಟ್‌ ಮಾಡಿದ್ದರು ಎಂಬುದನ್ನು ವಿಡಿಯೊದಲ್ಲಿ ತೋರಿಸಿದ್ದಾರೆ. ಜೊತೆಗೆ ಈ ವರ್ಕ್‌ಔಟ್‌ನಲ್ಲಿ ತಮ್ಮೊಂದಿಗೆ ಜೋಡಿಯಾದ ಸಹೋದರ ಇಬ್ರಾಹಿಂ ಹಾಗೂ ಗೆಳತಿಯರ ಫೋಟೊ, ವಿಡಿಯೊ ಕೂಡ ಇದೆ.
ಕಾರ್ಡಿಯೊ, ಈಜು, ಸೈಕ್ಲಿಂಗ್ ಹೀಗೆ ಹಲವು ವಿಧಗಳಲ್ಲಿ ವರ್ಕ್‌ಔಟ್‌ ಮಾಡಿದ ವಿಡಿಯೊ ಇದೆ. ಸಮಯ ಹಾಳು ಮಾಡದೆ ಮನೆಯಲ್ಲೂ ದಣಿಯುವ ಹಟಕ್ಕೆ ಬಿದ್ದವರಂತೆ ಸಹೋದರನೊಂದಿಗೆವ್ಯಾಯಾಮ ಮಾಡಿದ್ದಾರೆ. ಕೊರೊನಾ ಲಾಕ್‌ಡೌನ್ ಸಮಯದಲ್ಲಿಆನ್‌ಲೈನ್‌ ಕೋಚಿಂಗ್ ತೆಗೆದುಕೊಂಡು ದೇಹ ದಂಡಿಸಿದ್ದಾರೆ. ಅವರ ಫಿಟ್‌ನೆಸ್‌ಗೆ ಗುರುವಿನಿಂದ ಶಭಾಷ್‌ಗಿರಿ ಪಡೆದಿದ್ದಾರೆ.
ವಿಡಿಯೊ ಪೋಸ್ಟ್‌ ಮಾಡಿ ‘ನಮಸ್ತೆ, ಈ ಬದಲಾವಣೆ ನೋಡಿ’ ಎಂದಿದ್ದಾರೆ. ಇವರ ವಿಡಿಯೊಗೆ ಲಕ್ಷಾಂತರ ಅಭಿಮಾನಿಗಳು ಮೆಚ್ಚುಗೆ ವ್ಯಕ್ತಪಡಿಸಿದ್ದು, ‘ನೀವು ಎಲ್ಲರಿಗೂ ಸ್ಫೂರ್ತಿ’ ಎಂದು ಹೊಗಳಿದ್ದಾರೆ.
ಸಂದರ್ಶನವೊಂದರಲ್ಲಿ ತಮ್ಮ ಫಿಟ್‌ನೆಸ್‌ ಪಯಣದ ಬಗ್ಗೆ ಹೇಳಿಕೊಂಡಿರುವ23 ವರ್ಷದ ಚೆಲುವೆ ಸಾರಾ ‘ನ್ಯೂಯಾರ್ಕ್‌ನಲ್ಲಿ ಓದುವಾಗ 96 ಕೆ.ಜಿ ಇದ್ದೆ. ಈ ಹೆಚ್ಚುವರಿ ತೂಕ ಕಡಿಮೆ ಮಾಡಲು ಒಂದು ವರ್ಷ ನಿರಂತರವಾಗಿ ದೇಹ ದಂಡಿಸಿದೆ. ಪಿಜ್ಜಾದಿಂದ ಸಲಾಡ್‌ ತಿನ್ನುವ ಆರೋಗ್ಯಕರ ಅಭ್ಯಾಸ ಮಾಡಿಕೊಂಡಿದ್ದೇನೆ’ ಎಂದಿದ್ದಾರೆ.
ಗೋವಿಂದ್‌, ಕರೀಷ್ಮಾ ಕಪೂರ್ ಅಭಿನಯಿಸಿದ ‘ಕೂಲಿ ನಂಬರ್ 1’ ಸಿನಿಮಾದ ಹೆಸರನ್ನೇ ಇಟ್ಟುಕೊಂಡು ಮಾಡುತ್ತಿರುವ ಸಿನಿಮಾದಲ್ಲಿ ಸಾರಾ ಅಲಿ ಖಾನ್ ನಾಯಕಿಯಾಗಿ ಕಾಣಿಸಿಕೊಳ್ಳಲಿದ್ದಾರೆ. ಈ ಸಿನಿಮಾದಲ್ಲಿ ವರುಣ್‌ ಧವನ್ ಇವರ ಜೋಡಿ. ಡೇವಿಡ್ ಧವನ್ ನಿರ್ದೇಶನವಿದೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.