‘ಗಮನಂ’ನಲ್ಲಿ ಮಾತು ಬಾರದ ಹಳ್ಳಿ ಹುಡುಗಿ ಪಾತ್ರದಲ್ಲಿ ಶ್ರೀಯಾ

ನಟಿ ಶ್ರೀಯಾ ಶರಣ್ ನಟನೆಯ ಮುಂದಿನ ‘ಗಮನಂ’ ಸಿನಿಮಾದ ಕುರಿತು ದಿನಕ್ಕೊಂದು ಮಾಹಿತಿ ಹೊರ ಬೀಳುತ್ತಿದೆ. ಮೊನ್ನೆ ಶ್ರೀಯಾ ಹುಟ್ಟುಹಬ್ಬದ ದಿನದಂದು ಸಿನಿಮಾದ ಫಸ್ಟ್‌ಲುಕ್ ಬಿಡುಗಡೆ ಮಾಡಿತ್ತು ಚಿತ್ರತಂಡ. ಸದಾ ಗ್ಲಾಮರ್ ಪಾತ್ರಕ್ಕೆ ಹೆಸರುವಾಸಿಯಾಗಿದ್ದ ಶ್ರೀಯಾ ಪೋಸ್ಟರ್‌ನಲ್ಲಿ ಸಾಧಾರಣ ಸೀರೆ ಧರಿಸಿದ್ದ ಹೆಂಗಸಿನ ಪಾತ್ರದಲ್ಲಿ ಕಾಣಿಸಿಕೊಂಡು ಅಚ್ಚರಿ ಮೂಡಿಸಿದ್ದರು. ಈಗ ಸಿನಿಮಾದಲ್ಲಿ ಶ್ರೀಯಾದ್ದು ಮಾತು ಬಾರದ ಹಳ್ಳಿ ಹೆಂಗಸಿನ ಪಾತ್ರ ಎಂಬ ಸುದ್ದಿ ಚಿತ್ರತಂಡದಿಂದ ಹೊರ ಬಿದ್ದಿದೆ.

ಮೂರು ಕತೆಗಳನ್ನು ಹೊಂದಿರುವ ಈ ಸಿನಿಮಾದಲ್ಲಿ ಇನ್ನುಳಿದ ಎರಡು ಕತೆಗಳಲ್ಲಿ ಶಿವ ಕಂದುಕುರಿ ಹಾಗೂ ಪ್ರಿಯಾಂಕ ಜವಲ್‌ಕರ್ ಕಾಣಿಸಿಕೊಳ್ಳಲಿದ್ದಾರೆ.

ನಿರ್ದೇಶಕಿ ಸುಜನಾ ರಾವ್‌ ತಮ್ಮ ಪ್ಯಾನ್‌ ಇಂಡಿಯಾ ಸಿನಿಮಾದಲ್ಲಿ ಶ್ರೀಯಾಗೆ ಗ್ಲಾಮರ್ ಪಾತ್ರ ನೀಡಲಿದ್ದಾರೆ ಎಂಬ ಚರ್ಚೆ ನಡೆದಿತ್ತು. ಆದರೆ ಆ ಚರ್ಚೆಯನ್ನು ಅಂತ್ಯಗೊಳಿಸಿದ ಸುಜನ ಡಿ–ಗ್ಲಾಮರ್‌ ಪಾತ್ರ ನೀಡುವ ಮೂಲಕ ಅಚ್ಚರಿ ಮೂಡಿಸಿದ್ದಾರೆ.

‘ಶ್ರೀಯಾ ಸಿನಿಮಾದ ಸಂಪೂರ್ಣ ಕತೆ ಕೇಳಿದ ಬಳಿಕವಷ್ಟೇ ಈ ಪಾತ್ರದಲ್ಲಿ ನಟಿಸಲು ಒಪ್ಪಿಕೊಂಡರು’ ಎಂದು ಹೇಳಿದ್ದಾರೆ ಸುಜನಾ.

‘ಗಮನಂ’ ಸಿನಿಮಾದ ಪೋಸ್ಟ್ ಪ್ರೊಡಕ್ಷನ್ ಕೆಲಸಗಳು ನಡೆಯುತ್ತಿದ್ದು ಸಿನಿಮಾವನ್ನು ಕೊರೊನಾ ಪರಿಸ್ಥಿತಿ ಸುಧಾರಿಸಿದ ಮೇಲೆ ಥಿಯೇಟರ್‌ನಲ್ಲೇ ಬಿಡುಗಡೆ ಮಾಡುವ ಯೋಜನೆ ಹಾಕಿಕೊಂಡಿದೆ ಚಿತ್ರತಂಡ.