ನಟಿ ಊರ್ವಶಿ ರೌಟೆಲಾ ಮುಂಬೈನಲ್ಲಿ ₹190 ಕೋಟಿ ಬಂಗ್ಲೆ ಖರೀದಿಸಿದರೇ?

ಮುಂಬೈ: ಗ್ಲಾಮರಸ್ ಪಾತ್ರ ಹಾಗೂ ಬೋಲ್ಡ್ ಅಭಿನಯದ ಮೂಲಕ ಹೆಸರು ಗಳಿಸಿರುವ ಬಾಲಿವುಡ್ ನಟಿ ಊರ್ವಶಿ ರೌಟೆಲಾ ಬಗ್ಗೆ ಇತ್ತೀಚೆಗೆ ಕೆಲ ಟಿವಿ ವಾಹಿನಿ, ವೆಬ್‌ಸೈಟ್‌ ಹಾಗೂ ಸಾಮಾಜಿಕ ಮಾಧ್ಯಮಗಳಲ್ಲಿ ಸುದ್ದಿಯೊಂದು ಹರಿದಾಡಿತ್ತು.

ಊರ್ವಶಿ ಅವರು ಮುಂಬೈನ ಜುಹು ಪ್ರದೇಶದಲ್ಲಿ ₹190 ಕೋಟಿ ಬೆಲೆ ಬಾಳುವ ನಾಲ್ಕು ಮಹಡಿಯ ದೊಡ್ಡ ಬಂಗ್ಲೆ ಖರೀದಿಸಿದ್ದಾರೆ ಎಂದು ವದಂತಿ ಎದ್ದಿತ್ತು. ಈ ಮನೆ ನಿರ್ಮಾಪಕ ಯಶ್ ಚೋಪ್ರಾ ಅವರ ಮನೆಯ ಹಿಂದೆಯೇ ಇದೆ ಎಂದು ಸುಳ್ಳು ಸುದ್ದಿ ಹರಿಬಿಡಲಾಗಿತ್ತು.

ಈ ಬಗ್ಗೆ ಕಿಡಿಕಾರಿ ಇನ್‌ಸ್ಟಾಗ್ರಾಂನಲ್ಲಿ ಮಾಹಿತಿ ಹಂಚಿಕೊಂಡಿರುವ ಊರ್ವಶಿ ತಾಯಿ ಮೀರಾ ರೌಟೆಲಾ ಅವರು ಓ ದೇವಾ...! ಇದು ಸುಳ್ಳು ಸುದ್ದಿ, ಇಂತಹ ದಿನ ನಮಗೆ ಬೇಗ ಬರಲಿ ಎಂದು ಆಶಿಸುತ್ತೇನೆ.. ಇಂತ ಸುದ್ದಿ ಹಬ್ಬಿಸಿದ ಮಾಧ್ಯಮಗಳ ಪ್ರಾರ್ಥನೆ ಫಲಿಸಲಿ ಎಂದು ವ್ಯಂಗ್ಯವಾಗಿ ಹೇಳಿದ್ದಾರೆ.

ಈ ಬಗ್ಗೆ ನಟಿ ಊರ್ವಶಿ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ.

ಕನ್ನಡದ ದರ್ಶನ್ ಅಭಿನಯದ ಐರಾವತ್ ಸಿನಿಮಾದಲ್ಲಿ ಅಭಿನಯಿಸಿದ್ದ ಊರ್ವಶಿ ಸದ್ಯ ‘ದಿಲ್ ಹೇ ಗ್ರೇ’ ಎಂಬ ಹಿಂದಿ ಹಾಗೂ ‘ಬ್ಲ್ಯಾಕ್ ರೋಸ್’ ಎಂಬ ತೆಲುಗು ಸಿನಿಮಾದಲ್ಲಿ ಅಭಿನಯಿಸುತ್ತಿದ್ದಾರೆ.