ಕಲಬುರ್ಗಿಯಲ್ಲಿ ಶೀಘ್ರ ಸಿನಿಮಾ ಶೂಟಿಂಗ್: ಪುನೀತ್

ಕಲಬುರ್ಗಿ: ನಗರದಲ್ಲಿ ಶೀಘ್ರ ಒಂದು ಸಿನಿಮಾ ಶೂಟಿಂಗ್ ‌ಮಾಡಲಿದ್ದೇವೆ. ಯಾವ ಸಿನಿಮಾ ಎಂಬುದನ್ನು ಸದ್ಯದಲ್ಲೇ ಬಹಿರಂಗ ಪಡಿಸಲಿದ್ದೇವೆ ಎಂದು ಚಿತ್ರ ನಟ ಪುನೀತ್ ರಾಜ್‍ಕುಮಾರ್ ಪ್ರಕಟಿಸಿದರು.

ಅಲ್ಲಿನ ಶರಣಬಸವೇಶ್ವರ ದೇವಸ್ಥಾನದಲ್ಲಿ ತಮ್ಮನ್ನು ಭೇಟಿಯಾಗಲು ಬಂದಿದ್ದ ಅಭಿಮಾನಿಗಳನ್ನುದ್ದೇಶಿಸಿ ಮಾತನಾಡಿದ ಅವರು, ಕಲಬುರ್ಗಿ ನನಗೆ ಹೊಸದೇನೂ ಅಲ್ಲ. ಹಲವು ಬಾರಿ ಇಲ್ಲಿಗೆ ಭೇಟಿ ನೀಡಿದ್ದೇನೆ. ನಮ್ಮ ತಂದೆ ಡಾ.ರಾಜಕುಮಾರ್ ಅವರ ಕಾಲದಿಂದಲೂ ನನಗೆ ಈ ನಗರದೊಂದಿಗೆ ಒಡನಾಟವಿದೆ. ಗುಲಬರ್ಗಾ ಕಲಬುರ್ಗಿ ಆಗಿ ಬದಲಾದ ಬಳಿಕ, ಹೈದರಾಬಾದ್- ಕರ್ನಾಟಕ ಕಲ್ಯಾಣ ಕರ್ನಾಟಕ ಆದ ಬಳಿಕ ಮೊದಲ ಬಾರಿಗೆ ಭೇಟಿ ನೀಡುತ್ತಿದ್ದೇನೆ ಎಂದರು.

ಚಿತ್ರ ನಟರಾದ ಡಾಲಿ ಧನಂಜಯ, ರವಿಶಂಕರ್, ನಿರ್ದೇಶಕ ಸಂತೋಷ ಆನಂದರಾಮ್, ಶಾಸಕ ರಾಜಕುಮಾರ ಪಾಟೀಲ ತೆಲ್ಕೂರ, ಬಿಜೆಪಿ ಮುಖಂಡ ನಿತಿನ್ ಗುತ್ತೇದಾರ, ಅಖಿಲ ಭಾರತ ವೀರಶೈವ ‌ಮಹಾಸಭಾ ಜಿಲ್ಲಾ ಘಟಕದ ಅಧ್ಯಕ್ಷ ಶರಣಕುಮಾರ ಮೋದಿ ಇತರರು ಇದ್ದರು.