Bigg Boss Kannada 12: ಶೋ ಬಿಡ್ತಾರಾ ಧ್ರುವಂತ್?

ಬಿಗ್‌ಬಾಸ್‌ ಸೀಸನ್‌ 12ರ ಸ್ಪರ್ಧಿಯಾಗಿರುವ ಧ್ರುವಂತ್ ಅವರು ಕಾರ್ಯಕ್ರಮದಿಂದ ಹೊರ ನಡೆಯುವುದಾಗಿ ಹೇಳಿದ್ದಾರೆ. ಇಂದು ಬಿಡುಗಡೆಯಾದ ಪ್ರೋಮೊದಲ್ಲಿ ಅವರು ತಮ್ಮ ನಿರ್ಧಾರವನ್ನು ನಿರೂಪಕ ಸುದೀಪ್‌ ಮುಂದೆ ಹೇಳಿದ್ದಾರೆ.

ಇಂದಿನ ಸಂಚಿಕೆಯಲ್ಲಿ ಸುದೀಪ್‌ ಅವರು ಸ್ಪರ್ಧಿಗಳಿಗೆ ಟಾಸ್ಕ್‌ವೊಂದನ್ನು ನೀಡಿದ್ದು, ತಮ್ಮ ಮುಂದಿರುವ ಕಾರ್ಡ್‌ನಲ್ಲಿರುವ ಚಿತ್ರ ಮತ್ತು ಅದರಲ್ಲಿ ಬರೆದಿರುವ ಸಾಲು ಯಾರಿಗೆ ಹೋಲಿಕೆಯಾಗುತ್ತೊ ಅದನ್ನು ಆ ಸ್ಪರ್ಧಿಯ ಕೊರಳಿಗೆ ಹಾಕುವಂತೆ ಹೇಳಿದ್ದಾರೆ.

ಹೆಚ್ಚಿನ ಸ್ಪರ್ಧಿಗಳು ಧ್ರುವಂತ್‌ಗೆ ಚೇಳಿನ(ಕುತಂತ್ರಿ) ಚಿತ್ರವನ್ನು ಹಾಕಿದ್ದಾರೆ. ಅಲ್ಲದೇ ಧ್ರುವಂತ್ ಅವರು ಮನೆಮಂದಿಯ ತಲೆ ಕೆಡಿಸುವ ಕೆಲಸ ಮಾಡುತ್ತಿದ್ದಾರೆ ಎಂದು ಆರೋಪಿಸಿದ್ದಾರೆ.

ಈ ವೇಳೆ ತಮಗೆ ಹಾಕಿದ್ದ ಹಾರವನ್ನು ತೆಗೆದ ಧ್ರುವಂತ್ ಅವರಿಗೆ ಸುದೀಪ್‌ ಅವರು ಅದನ್ನು ಹಾಕಿಯೇ ಇರುವಂತೆ ಹೇಳಿದ್ದಾರೆ. ಅದಕ್ಕೆ ಪ್ರತಿಕ್ರಿಯಿಸಿದ ಧ್ರುವಂತ್, ಇದನ್ನು ಧರಿಸುವುದಕ್ಕಿಂತ ಶೋದಿಂದ ಹೊರ ನಡೆಯುತ್ತೇನೆ ಎಂದಿದ್ದಾರೆ.

ಏತನ್ಮಧ್ಯೆ, ಸ್ಪರ್ಧಿಯೊಬ್ಬರ ವಿರುದ್ಧ ಅಶ್ಲೀಲ ಪದ ಬಳಕೆ ಮಾಡುವ ಮೂಲಕ ಧ್ರುವಂತ್ ಅವರು ಮನೆಮಂದಿಯ ಕಂಗೆಣ್ಣಿಗೆ ಗುರಿಯಾಗಿದ್ದಾರೆ. ಈ ವಾರ ಹೊರಹೋಗುವ ಸ್ಪರ್ಧಿಗಳ ಪಟ್ಟಿಯಲ್ಲಿ ಅವರ ಹೆಸರು ಸೇರಿದೆ.

ಬಿಗ್‌ಬಾಸ್‌ ಆರಂಭವಾಗಿ 63 ದಿನ ಪೂರೈಸಿದ್ದು, ಈ ವಾರ ಯಾರು ಮನೆಯಿಂದ ಹೊರನಡೆಯುತ್ತಾರೆ ಎಂಬುದು ಇಂದು ರಾತ್ರಿ ಗೊತ್ತಾಗಲಿದೆ.