ಟಿಕೆಟ್ ದರ ಏರಿಕೆಗೆ ಮಮತಾ ಕೆಂಡಾಮಂಡಲ

ನಂದಿಗ್ರಾಮ (ಪಿಟಿಐ): ಕಳೆದ 10 ವರ್ಷಗಳಲ್ಲಿ ಇದೇ ಮೊದಲ ಬಾರಿಗೆ ಪ್ರಯಾಣಿಕ ರೈಲು ಟಿಕೆಟ್ ದರದಲ್ಲಿ ಹೆಚ್ಚಳ ಮಾಡಿರುವುದಕ್ಕೆ ತೀವ್ರ ವಿರೋಧ ವ್ಯಕ್ತಪಡಿಸಿರುವ ಮಮತಾ ಬ್ಯಾನರ್ಜಿ ಅವರು ದರ ಏರಿಕೆಯನ್ನು ತಾವು ಒಪ್ಪುವುದಿಲ್ಲ ಎಂದು ಹೇಳಿದ್ದಾರೆ.

 ಅಲ್ಲದೆ ಬೆಲೆ ಏರಿಸಲು ತಾವು ಬಿಡುವುದೂ ಇಲ್ಲ ಎಂದು ಹೇಳುವ ಮೂಲಕ ದೀದಿ ಯುಪಿಎ ನಲ್ಲಿ ಹೊಸದೊಂದು ಬಿಕ್ಕಟ್ಟನ್ನು ಸೃಷ್ಟಿಸಿದ್ದಾರೆ.

ತಮಗೆ ಟಿಕೆಟ್ ದರ ಏರಿಕೆ ಕುರಿತು ಮೊದಲೇ ಗೊತ್ತಿರಲಿಲ್ಲ ಎಂದಿರುವ ಅವರು ಜನಸಾಮಾನ್ಯರ ಮೇಲೆ ಹೊರೆಯಾಗುವಂತಹ ಟಿಕೆಟ್ ದರ ಏರಿಕೆಯನ್ನು ಜಾರಿಯಾಗಲು ಬಿಡುವುದಿಲ್ಲ ಎಂಬ ಆಶ್ವಾಸನೆಯನ್ನು ಜನತೆಗೆ ನೀಡಿದ್ದಾರೆ.

ಅವರು ಪಶ್ಚಿಮಬಂಗಾಳದ ನಂದಿಗ್ರಾಮದಲ್ಲಿ ಸರ್ಕಾರಿ ಕಾರ್ಯಕ್ರಮವೊಂದರಲ್ಲಿ ಮಾತನಾಡುತ್ತಿದ್ದರು.

ಈಗಾಗಲೇ ತೃಣಮೂಲ ಕಾಂಗ್ರೆಸ್‌ನ ಸಂಸದೀಯ ಘಟಕವು ರೈಲ್ವೆ ಸಚಿವ ದಿನೇಶ್ ತ್ರಿವೇದಿ ಅವರೊಂದಿಗೆ ಟಿಕೆಟ್ ದರ ಏರಿಕೆಯ ವಿಚಾರದ ಬಗೆಗೆ ಚರ್ಚೆ ಆರಂಭಿಸಿದೆ ಎಂದು ಅವರು ಇದೇ ವೇಳೆ ತಿಳಿಸಿದರು.