ತೆಲಂಗಾಣ ಅಧಿಕೃತ ಉದಯ

ನವದೆಹಲಿ (ಪಿಟಿಐ): ತೆಲಂ­ಗಾಣ ರಚನೆಗೆ ಸಂಸತ್‌ ಅಂಗೀ­ಕರಿ­ಸಿದ ‘ಆಂಧ್ರ­ಪ್ರದೇಶ ಪುನರ್‌ರಚನೆ ಮಸೂ­ದೆ­’ ಮತ್ತು ರಾಜ್ಯದಲ್ಲಿ ರಾಷ್ಟ್ರಪತಿ ಆಡಳಿತ ವಿಧಿಸುವ ಕೇಂದ್ರ ಸಚಿವ ಸಂಪು­ಟದ ಶಿಫಾರಸಿಗೆ ರಾಷ್ಟ್ರಪತಿ ಪ್ರಣವ್‌ ಮುಖರ್ಜಿ ಶನಿವಾರ ಅಂಕಿತ ಹಾಕಿ­ದ್ದಾರೆ.

ಈ ಮೂಲಕ ದೇಶದ 29ನೇ ರಾಜ್ಯ­ವಾಗಿ ತೆಲಂಗಾಣ ಅಧಿಕೃತವಾಗಿ ಉದ­ಯವಾಗಿದೆ. 15ನೇ ಲೋಕ­ಸಭೆಯ ಕಡೆಯ ಅಧಿವೇಶನದಲ್ಲಿ ಕೋಲಾಹಲಕ್ಕೆ ಕಾರಣವಾಗಿ ಗದ್ದಲ, ರಂಪಾಟದ ಮಧ್ಯೆಯೇ ಈ ಮಸೂದೆಗೆ ಅಂಗೀಕಾರ ದೊರಕಿತ್ತು.

ಅಖಂಡ ಆಂಧ್ರವನ್ನು ಸೀಮಾಂಧ್ರ (ಕರಾವಳಿ ಮತ್ತು ರಾಯಲಸೀಮೆ) ಮತ್ತು ತೆಲಂಗಾಣ ಎಂದು ವಿಭಜಿಸಿ ಸೀಮಾಂಧ್ರ ಭಾಗಕ್ಕೆ 13 ಜಿಲ್ಲೆಗಳು, ತೆಲಂಗಾಣಕ್ಕೆ ಹೈದರಾಬಾದ್‌ ನಗರವೂ ಸೇರಿ 10 ಜಿಲ್ಲೆಗಳನ್ನು ಸೇರಿಸಲಾಗಿದೆ.

ಆಂಧ್ರ ಇಬ್ಭಾಗದಿಂದ ಸಿಟ್ಟಿಗೆದಿರುವ ಸೀಮಾಂಧ್ರದ ಜನರನ್ನು ಸಮಾಧಾನ ಪಡಿಸಲು ಕೇಂದ್ರ ಸರ್ಕಾರ ಈ ಭಾಗಕ್ಕೆ ವಿಶೇಷ ಸ್ಥಾನಮಾನ ಘೋಷಣೆ ಮಾಡಿದೆ. ಜೊತೆಗೆ ಈ ಎರಡೂ ರಾಜ್ಯಗಳ ಅಭಿವೃದ್ಧಿಗೆ ಆರು ಅಂಶಗಳ ಯೋಜನೆಯನ್ನು ಘೋಷಿಸಿದೆ.

ತೆಲಂಗಾಣ ರಚನೆ ವಿರೋಧಿಸಿ ಆಂಧ್ರ­ಪ್ರದೇಶಚ ಮುಖ್ಯಮಂತ್ರಿ ಕಿರಣ್‌ ಕುಮಾರ್‌ ಅವರ ಸರ್ಕಾರ ರಾಜೀ­ನಾಮೆ ನೀಡಿದ ಹಿನ್ನೆಲೆಯಲ್ಲಿ ಕೇಂದ್ರ ಸಚಿವ ಸಂಪುಟ ರಾಜ್ಯದಲ್ಲಿ ರಾಷ್ಟ್ರಪತಿ ಆಡಳಿತ ವಿಧಿಸಲು ಶುಕ್ರವಾರ ಮಾಡಿದ್ದ ಶಿಫಾರಸಿಗೂ ರಾಷ್ಟ್ರಪತಿ ಶನಿವಾರ ಸಹಿ ಮಾಡಿದ್ದಾರೆ.