ನವದೆಹಲಿ/ಹೈದರಾಬಾದ್: ಮೂಗಿನ ಮೂಲಕ ಹಾಕಬಹುದಾದ (ಇಂಟ್ರಾನೇಸಲ್) ಕೋವಿಡ್ ಲಸಿಕೆಯ ಮೂರನೇ ಹಂತದ ಕ್ಲಿನಿಕಲ್ ಟ್ರಯಲ್ ನಡೆಸಲು ಭಾರತೀಯ ಔಷಧ ನಿಯಂತ್ರಕರು (ಡಿಸಿಜಿಐ) ಭಾರತ್ ಬಯೋಟೆಕ್ಗೆ ಅನುಮತಿ ನೀಡಿದ್ದಾರೆ.
ಈಗಾಗಲೇ ಕೋವಿಡ್ ಲಸಿಕೆಗಳ ಎರಡು ಡೋಸ್ಗಳನ್ನು ಪಡೆದವರಿಗೆಭಾರತ್ ಬಯೋಟೆಕ್ ಅಭಿವೃದ್ಧಿಪಡಿಸಿರುವ ಈ ಇಂಟ್ರಾನೇಸಲ್ (ಬಿಬಿವಿ154) ಲಸಿಕೆಯನ್ನು ಬೂಸ್ಟರ್ ಡೋಸ್ ಆಗಿ ನೀಡುವ ಉದ್ದೇಶ ಹೊಂದಲಾಗಿದೆ.
ದೆಹಲಿಯ ಎಐಐಎಂಎಸ್ ಸೇರಿದಂತೆ ದೇಶದ ಆಯ್ದ ಐದು ಕೇಂದ್ರಗಳಲ್ಲಿ ಈ ಲಸಿಕೆಯ ಕ್ಲಿನಿಕಲ್ ಟ್ರಯಲ್ ನಡೆಯಲಿದೆ ಎಂದು ಮೂಲಗಳು ತಿಳಿಸಿವೆ.
‘ಕೋವಿಡ್ ಲಸಿಕೆಯ ಎರಡು ಡೋಸ್ಗಳನ್ನು ಪಡೆದವರು ಈ ಕ್ಲಿನಿಕಲ್ ಟ್ರಯಲ್ನಲ್ಲಿ ಪಾಲ್ಗೊಳ್ಳುವರು. ಇಂಟ್ರಾನೇಸಲ್ ಲಸಿಕೆಯಿಂದ ಇವರಲ್ಲಿ ಎಷ್ಟು ಪ್ರಮಾಣದಲ್ಲಿ ರೋಗ ನಿರೋಧಕ ಶಕ್ತಿ ಉತ್ಪತ್ತಿಯಾಯಿತು ಹಾಗೂ ಎಷ್ಟರ ಮಟ್ಟಿಗೆ ಈ ಲಸಿಕೆ ಸುರಕ್ಷಿತ ಎಂಬುದರ ಮೌಲ್ಯಮಾಪನ ನಡೆಸಲು ಕಂಪನಿಗೆ ಜ.27ರಂದು ಅನುಮತಿ ನೀಡಲಾಗಿದೆ’ ಡಿಸಿಜಿಐ ಮೂಲಗಳು ಹೇಳಿವೆ.
ಲಸಿಕೆಯ ಕ್ಲಿನಿಕಲ್ ಟ್ರಯಲ್ಗೆ ಅನುಮತಿ ಕೋರಿ ಕಂಪನಿಯು ಕಳೆದ ಡಿಸೆಂಬರ್ನಲ್ಲಿ ಡಿಸಿಜಿಐಗೆ ಅರ್ಜಿ ಸಲ್ಲಿಸಿತ್ತು.
‘ಈ ಲಸಿಕೆಯನ್ನು ಸುಲಭವಾಗಿ ಹಾಕಬಹುದು. ಸಿರಿಂಜ್ ಹಾಗೂ ಸೂಜಿಗಳ ಅಗತ್ಯವೇ ಇರುವುದಿಲ್ಲ. ಅಲ್ಲದೇ, ಲಸಿಕೆ ಕಾರ್ಯಕ್ರಮಕ್ಕೆ ತಗುಲುವ ವೆಚ್ಚ ಗಣನೀಯವಾಗಿ ಕಡಿಮೆಯಾಗುವುದು’ ಎಂದು ಕಂಪನಿಯ ಅಧ್ಯಕ್ಷ ಕೃಷ್ಣ ಎಲ್ಲಾ ಪ್ರತಿಕ್ರಿಯಿಸಿದ್ದಾರೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.