ರಷ್ಯಾ–ಗೋವಾ ವಿಮಾನಕ್ಕೆ ಹುಸಿ ಬಾಂಬ್‌ ಬೆದರಿಕೆ

ಜಾಮ್‌ನಗರ (ಗುಜರಾತ್‌) (ಪಿಟಿಐ): ರಷ್ಯಾದಿಂದ ಗೋವಾಗೆ ಸೋಮವಾರ ರಾತ್ರಿ ಹೊರಟಿದ್ದ ಅಜರ್‌ ಏರ್‌ ಅಂತರರಾಷ್ಟ್ರೀಯ ವಿಮಾನಕ್ಕೆ ಬಾಂಬ್‌ ಬೆದರಿಕೆ ಬಂದ ಕಾರಣ ಜಾಮ್‌ನಗರದಲ್ಲಿ ಸೋಮವಾರ ರಾತ್ರಿ ವಿಮಾನವನ್ನು ತುರ್ತು ಭೂಸ್ಪರ್ಶ ಮಾಡಲಾಯಿತು. ತಪಾಸಣೆ ಬಳಿಕ ಮಂಗಳವಾರ ಮಧ್ಯಾಹ್ನ ವಿಮಾನವು ಗೋವಾಕ್ಕೆ ತೆರಳಿತು.

‘ರಾಷ್ಟ್ರೀಯ ಭದ್ರತಾ ಪಡೆಗಳು ಹಾಗೂ ಬಾಂಬ್‌ ನಿಷ್ಕ್ರಿಯ ಪಡೆಗಳು ವಿಮಾನವನ್ನು ಕೂಲಂಕಷವಾಗಿ ಪರಿಶೀಲನೆ ನಡೆಸಿದ ಬಳಿಕ ಇದೊಂದು ಹುಸಿ ಬಾಂಬ್‌ ಕರೆ ಎಂದು ತಿಳಿದುಬಂದಿತು. ತುರ್ತು ಭೂಸ್ಪರ್ಶವಾಗಿ 15 ಗಂಟೆಗಳ ನಂತರ ವಿಮಾನವು ಗೋವಾಗೆ ಹೊರಟಿತು’ ಎಂದು ಜಾಮ್‌ನಗರದ ಪೊಲೀಸ್‌ ವರಿಷ್ಠಾಧಿಕಾರಿ ಪ್ರೇಮ್‌ಸುಖ್‌ ಡೇಲು ತಿಳಿಸಿದರು.

‘ವಿಮಾನದಲ್ಲಿ 236 ಪ್ರಯಾಣಿಕರು ಹಾಗೂ 8 ಮಂದಿ ಸಿಬ್ಬಂದಿ ಇದ್ದರು. ಬಾಂಬ್‌ ಬೆದರಿಕೆ ಬಂದ ಕಾರಣ ಈ ಎಲ್ಲರನ್ನೂ ಸೋಮವಾರ ರಾತ್ರಿ 9.49ಕ್ಕೆ ವಿಮಾನದಿಂದ ವಿಮಾನ ನಿಲ್ದಾಣಕ್ಕೆ ಸುರಕ್ಷಿತವಾಗಿ ಕಳುಹಿಸಲಾಗಿತ್ತು. ಪ್ರಯಾಣಿಕರು ಹಾಗೂ ಸಿಬ್ಬಂದಿ ರಾತ್ರಿ ಇಡೀ ವಿಮಾನ ನಿಲ್ದಾಣದ ಲಾಂಜ್‌ನಲ್ಲಿಯೇ ಕಳೆದರು’ ಎಂದು ಅಧಿಕಾರಿಗಳು ಮಾಹಿತಿ ನೀಡಿದರು.