ರೈಲ್ವೆ ಕೆಲಸಕ್ಕಾಗಿ ಭೂಮಿ ಪರಭಾರೆ ಹಗರಣ: ಲಾಲು ಆಪ್ತನ ಬಂಧನ

ನವದೆಹಲಿ (ಪಿಟಿಐ): ರೈಲ್ವೆ ಇಲಾಖೆಯಲ್ಲಿ ‘ಡಿ’ ದರ್ಜೆಯ ಕೆಲಸ ಕೊಡಿಸುವ ಸಲುವಾಗಿ ಉದ್ಯೋಗಕಾಂಕ್ಷಿಗಳಿಂದ ಭೂಮಿ ಪಡೆದು ಅದನ್ನು ಲಾಲುಪ್ರಸಾದ್‌ ಯಾದವ್‌ ಅವರ ಕುಟುಂಬ ಸದಸ್ಯರಿಗೆ ಪರಭಾರೆ ಮಾಡಿದ್ದ ಹಗರಣಕ್ಕೆ ಸಂಬಂಧಿಸಿದಂತೆ ಲಾಲು ಆಪ್ತ ಭೋಲಾ ಯಾದವ್‌ ಎಂಬುವರನ್ನು ಸಿಬಿಐ ಬುಧವಾರ ಬಂಧಿಸಿದೆ.

ಭೋಲಾ ಅವರಿಗೆ ಸೇರಿದ ನಾಲ್ಕು ಸ್ಥಳಗಳಲ್ಲಿ (ದರ್ಭಾಂಗ ಮತ್ತು ಪಟ್ನಾ) ಸಿಬಿಐ ಅಧಿಕಾರಿಗಳು ಬುಧವಾರ ಶೋಧ ಕಾರ್ಯಾಚರಣೆ ನಡೆಸಿದ್ದಾರೆ.

‘ಲಾಲುಪ್ರಸಾದ್‌ ಅವರು ಯು‍ಪಿಎ ಸರ್ಕಾರದಲ್ಲಿ ರೈಲ್ವೆ ಸಚಿವರಾಗಿದ್ದಾಗ (2005–2009) ಭೋಲಾ ಅವರು ಲಾಲು ಕಚೇರಿಯಲ್ಲಿ ವಿಶೇಷ ಅಧಿಕಾರಿಯಾಗಿ ಕೆಲಸ ಮಾಡಿದ್ದರು. ಅವರು ಉದ್ಯೋಗಕಾಂಕ್ಷಿಗಳ ಕುಟುಂಬಕ್ಕೆ ಸೇರಿದ ಭೂಮಿಯನ್ನು ಲಾಲು ಕುಟುಂಬದ ಸದಸ್ಯರಿಗೆ ಪರಭಾರೆ ಮಾಡುವಲ್ಲಿ ಪ್ರಮುಖ ಪಾತ್ರ ನಿಭಾಯಿಸಿರುವ ಅನುಮಾನವಿದೆ’ ಎಂದು ಸಿಬಿಐ ಹೇಳಿದೆ.