ಕೋವಿಡ್ ಲಸಿಕೆ: 30 ಕೋಟಿ ಡೋಸ್‌ಗೆ ಬಯೋಲಾಜಿಕಲ್-ಇ ಕಂಪನಿ ಜತೆಗೆ ಕೇಂದ್ರ ಒಪ್ಪಂದ
ನವದೆಹಲಿ: ಹೈದರಾಬಾದ್ ಮೂಲದ ಲಸಿಕೆ ತಯಾರಕ ಕಂಪನಿಯಾದ ‘ಬಯೋಲಾಜಿಕಲ್-ಇ’ ಜೊತೆ ಕೋವಿಡ್–19ರ 30 ಕೋಟಿ ಲಸಿಕಾ ಡೋಸ್‌ಗಳನ್ನು ಕಾಯ್ದಿರಿಸುವುದಕ್ಕೆ ಕೇಂದ್ರ ಆರೋಗ್ಯ ಸಚಿವಾಲಯವು ಒಪ್ಪಂದ ಮಾಡಿಕೊಂಡಿದೆ. ಇದಕ್ಕಾಗಿ ಮುಂಗಡವಾಗಿ ₹1500 ಕೋಟಿಯನ್ನು ಕೇಂದ್ರ ಪಾವತಿಸಲಿದೆ.
ಈ ಲಸಿಕೆಯ ಡೋಸ್‌ಗಳನ್ನು ಈ ವರ್ಷದ ಆಗಸ್ಟ್‌ನಿಂದ ಡಿಸೆಂಬರ್‌ವರೆಗೆ ‘ಬಯೋಲಾಜಿಕಲ್-ಇ’ ತಯಾರಿಸುತ್ತದೆ ಮತ್ತು ಸಂಗ್ರಹಿಸುತ್ತದೆ ಎಂದು ಗುರುವಾರ ಸಚಿವಾಲಯದ ಪ್ರಕಟಣೆ ತಿಳಿಸಿದೆ.
‘ಬಯೋಲಾಜಿಕಲ್-ಇ’ ಕಂಪನಿ ತಯಾರಿಸಿರುವ ಕೋವಿಡ್ ಲಸಿಕೆಯು ಮೊದಲ ಮತ್ತು ಎರಡನೇ ಹಂತದ ಪ್ರಯೋಗಗಳಲ್ಲಿ ಭರವಸೆಯ ಫಲಿತಾಂಶಗಳನ್ನು ನೀಡಿದ್ದು, ಇದೀಗ ಮೂರನೇ ಹಂತದ ಕ್ಲಿನಿಕಲ್‌ ಪ್ರಯೋಗಕ್ಕೆ ಒಳಪಟ್ಟಿದೆ.
ಇದು ‘ಆರ್‌ಬಿಡಿ ಪ್ರೋಟೀನ್ ಸಬ್‌ ಯುನಿಟ್‌’ ಲಸಿಕೆಯಾಗಿದ್ದು, ಮುಂದಿನ ಕೆಲ ತಿಂಗಳುಗಳಲ್ಲಿ ಲಭ್ಯವಾಗುವ ಸಾಧ್ಯತೆಯಿದೆ.
ಕೋವಿಡ್ 19 ಲಸಿಕೆ ಸಂಬಂಧ ರಚಿಸಲಾಗಿರುವ ರಾಷ್ಟ್ರೀಯ ತಜ್ಞರ ಗುಂಪು ಈ ಲಸಿಕೆ ಕುರಿತು ಪರಿಶೀಲಿಸಿದ ಬಳಿಕ ‘ಬಯೋಲಾಜಿಕಲ್-ಇ’ ಕಂಪನಿಯ ಪ್ರಸ್ತಾವವದ ಅನುಮೋದನೆಗೆ ಶಿಫಾರಸು ಮಾಡಲಾಗಿದೆ ಎಂದು ಪ್ರಕಟಣೆ ತಿಳಿಸಿದೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.