ಮಕ್ಕಳಿಗೆ ಲಸಿಕೆ | ವೈಜ್ಞಾನಿಕ ಮಾಹಿತಿ ಆಧರಿಸಿಯೇ ನಿರ್ಧಾರ: ನೀತಿ ಆಯೋಗ

ನವದೆಹಲಿ: ‘ವಾಟ್ಸ್‌ಆ್ಯಪ್‌ ಗ್ರೂಪ್‌ನಲ್ಲಿ ಪ್ರಸಾರವಾಗುವ ‘ಗಾಬರಿ ಹುಟ್ಟಿಸುವ ಸಂದೇಶಗಳು, ರಾಜಕೀಯ ಹಿನ್ನೆಲೆಯ ಬೇಡಿಕೆಗಳನ್ನು ಆಧರಿಸಿ ದೇಶದ ಮಕ್ಕಳಿಗೆ ಕೋವಿಡ್‌ ಲಸಿಕೆ ನೀಡುವ ಕುರಿತು ನಿರ್ಧಾರ ಕೈಗೊಳ್ಳಲು ಆಗುವುದಿಲ್ಲ’ ಎಂದು ನೀತಿ ಆಯೋಗದ ಸದಸ್ಯ (ಆರೋಗ್ಯ) ಡಾ.ವಿ.ಕೆ.ಪೌಲ್‌ ಗುರುವಾರ ಹೇಳಿದ್ದಾರೆ.

‘ಹಲವು ಹಂತದ ಕ್ಲಿನಿಕಲ್‌ ಟ್ರಯಲ್‌ ನಡೆಯಬೇಕು. ನಂತರ, ಲಭ್ಯವಾಗುವ ವೈಜ್ಞಾನಿಕ ಮಾಹಿತಿಯ ಆಧಾರದ ಮೇಲೆಯೇ ಮಕ್ಕಳಿಗೆ ಲಸಿಕೆ ನೀಡುವ ಕುರಿತು ನಿರ್ಧಾರ ಕೈಗೊಳ್ಳಬೇಕಾಗುತ್ತದೆ’ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.

‘12 ವರ್ಷದೊಳಗಿನ ಮಕ್ಕಳಿಗೆ ಯಾವ ದೇಶದಲ್ಲಿಯೂ ಲಸಿಕೆ ನೀಡುತ್ತಿಲ್ಲ. ಈ ವಯೋಮಾನದ ಮಕ್ಕಳಿಗೆ ಲಸಿಕೆ ನೀಡುವಂತೆ ವಿಶ್ವ ಆರೋಗ್ಯ ಸಂಸ್ಥೆ ಸಹ ಶಿಫಾರಸು ಮಾಡಿಲ್ಲ‘ ಎಂದೂ ಹೇಳಿದ್ದಾರೆ.