ಶಾಲೆ ಮುಚ್ಚಿ ಮದ್ಯದಂಗಡಿ ತೆರೆದ ಟಿಎಂಸಿ ಸರ್ಕಾರ: ಸಿ‍ಪಿಎಂ ಆರೋಪ

ಕೋಲ್ಕತ್ತ: ಪಶ್ಚಿಮ ಬಂಗಾಳದ ಸರ್ಕಾರದ ವಿರುದ್ಧ ಸಿ‍ಪಿಎಂ ಹಮ್ಮಿಕೊಂಡಿರುವ ‘ಬಂಗಾಳ ಬಚಾವೋ ಯಾತ್ರಾ’ (ಬಂಗಾಳವನ್ನು ರಕ್ಷಿಸಿ) ರ್‍ಯಾಲಿಯು ಜಲ್‌ಪೈಗುರಿ ಜಿಲ್ಲೆಯಲ್ಲಿ ಭಾನುವಾರ ನಡೆಯಿತು. ಪಕ್ಷದ ಸಾವಿರಾರು ಕಾರ್ಯಕರ್ತರು ರ್‍ಯಾಲಿಯಲ್ಲಿ ಭಾಗಿಯಾಗಿದ್ದರು. 

‘ಕಾರ್ಮಿಕರು, ರೈತರು ಹಾಗೂ ಬಡವರ ಹಕ್ಕುಗಳನ್ನು ರಕ್ಷಿಸಬೇಕಾದರೆ, 2026ರ ವಿಧಾನಸಭೆ ಚುನಾವಣೆಯಲ್ಲಿ ಟಿಎಂಸಿಯನ್ನು ಅಧಿಕಾರದಿಂದ ಕಿತ್ತೊಗೆಯಿರಿ’ ಎಂದು ಜನರಿಗೆ ಸಿ‍ಪಿಎಂ ಮನವಿ ಮಾಡಿತು. ಬಾವುಟ ಮತ್ತು ಫಲಕಗಳನ್ನು ಹಿಡಿದು ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿ ಹಾಗೂ ಸರ್ಕಾರದ ವಿರುದ್ಧ ಕಾರ್ಯಕರ್ತರು ಘೋಷಣೆ ಕೂಗಿದರು. 

ಪಕ್ಷದ ರಾಜ್ಯ ಮಂಡಳಿ ಕಾರ್ಯದರ್ಶಿ ಎಂ.ಡಿ ಸಲೀಂ ಹಾಗೂ ರಾಷ್ಟ್ರೀಯ ಸಮಿತಿ ಸದಸ್ಯರಾದ ಮೀನಾಕ್ಷಿ ಮುಖರ್ಜಿ ಅವರು ರ್‍ಯಾಲಿಯ ನೇತೃತ್ವ ವಹಿಸಿದ್ದರು. 

‘ಟಿಎಂಸಿ ಸರ್ಕಾರವು ಉದ್ಯೋಗ ಸೃಷ್ಟಿಸುವಲ್ಲಿ ವಿಫಲವಾಗಿದೆ. ರಾಜ್ಯಕ್ಕೆ ವಿನಾಶ ತಂದಿದೆ. ಇದರ ಆಡಳಿತದಲ್ಲಿ ಕಳೆದ 14 ವರ್ಷದಲ್ಲಿ 3,822ಕ್ಕೂ ಹೆಚ್ಚು ಶಾಲೆಗಳನ್ನು ಮುಚ್ಚಲಾಗಿದೆ. ಆದರೆ ಇದೇ ಅವಧಿಯಲ್ಲಿ 22,000 ಮದ್ಯದ ಅಂಗಡಿಗಳನ್ನು ತೆರೆಯಲಾಗಿದೆ’ ಎಂದು ಮೀನಾಕ್ಷಿ ಆರೋಪಿಸಿದರು.

ಪಕ್ಷವು ರಾಜ್ಯದಾದ್ಯಂತ 1,000 ಕಿ.ಮೀ ವ್ಯಾಪ್ತಿಯಲ್ಲಿ ‘ಬಂಗಾಳ ಬಚಾವೋ ಯಾತ್ರಾ’ ರ್‍ಯಾಲಿಯನ್ನು ಈ ಹಮ್ಮಿಕೊಂಡಿದೆ.