ದೆಹಲಿಯಲ್ಲಿ ಉಬರ್ ಚಾಲಕನಿಂದ ಲೈಂಗಿಕ ಕಿರುಕುಳ ಆರೋಪ: ದೂರು ದಾಖಲು

ನವದೆಹಲಿ: ಉಬರ್ ಆಟೋ ಚಾಲಕನಿಂದ ಲೈಂಗಿಕ ಕಿರುಕುಳ ನಡೆದಿದೆ ಎಂದು ದೆಹಲಿಯ ನ್ಯೂ ಫ್ರೆಂಡ್ಸ್ ಕಾಲೋನಿಯಲ್ಲಿ ಪತ್ರಕರ್ತೆಯೊಬ್ಬರು ಗುರುವಾರ ರಾತ್ರಿ ದೂರು ನೀಡಿದ್ದು, ಪ್ರಕರಣ ದಾಖಲಿಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಭಾರತ್ ನಗರ ನಿವಾಸಿಯಾದ ಪತ್ರಕರ್ತೆಯು ಬುಧವಾರ ಸಂಜೆ 4.40ರ ಸುಮಾರಿಗೆ ನ್ಯೂ ಫ್ರೆಂಡ್ಸ್ ಕಾಲೋನಿಯಿಂದ ಮಲ್ವಿಯಾ ನಗರದಲ್ಲಿರುವ ತನ್ನ ಸ್ನೇಹಿತೆಯ ಮನೆಗೆ ಉಬರ್ ಆಟೊದಲ್ಲಿ ತೆರಳುತ್ತಿದ್ದಾಗ, ಆಟೋ ಚಾಲಕ ಪತ್ರಕರ್ತೆಯನ್ನು ಕಾಮುಕ ದೃಷ್ಟಿಯಿಂದ ನೋಡಿದ ಎಂದು ಆರೋಪಿಸಲಾಗಿದೆ. ಗವಿಂದ್‌ಪುರಿಯ ನೆಹರು ಕ್ಯಾಂಪ್ ನಿವಾಸಿ ಮಹಮ್ಮದ್‌ ಯುನಸ್ ಖಾನ್‌ ಆಟೊ ಹೆಸರಿನಲ್ಲಿ ನೋಂದಣಿಯಾಗಿದ್ದು, ಅವರ ವಿಚಾರಣೆ ನಡೆಸಲಾಗುತ್ತಿದೆ. ಆರೋಪಿ ಪತ್ತೆಗಾಗಿ ತನಿಖೆ ಆರಂಭಿಸಲಾಗಿದೆ ಎಂದು ಆಗ್ನೇಯ ಭಾಗದ ಉಪ ಪೊಲೀಸ್ ಆಯುಕ್ತ ರಾಜೇಶ್‌ ಡಿಯೋ ತಿಳಿಸಿದ್ದಾರೆ.

ಈ ಘಟನೆಯನ್ನು ಪತ್ರಕರ್ತೆಯು ತನ್ನ ಟ್ವಿಟರ್ ಖಾತೆಯಲ್ಲಿ ಹಂಚಿಕೊಂಡಿದ್ದು, ‘ಆಟೊದಲ್ಲಿ ಪ್ರಯಾಣಿಸುತ್ತಿದ್ದಾಗ, ಚಾಲಕ ಆಟೊದ ಎಡಗಡೆ ಇದ್ದ ಕನ್ನಡಿಯಿಂದ ತನ್ನನ್ನು, ಅದರಲ್ಲೂ ನನ್ನ ಎದೆಯ ಭಾಗವನ್ನು ದಿಟ್ಟಿಸಿ ನೋಡುತ್ತಿದ್ದ. ಆಗ ನಾನು ಆಟೊದ ಬಲ ಭಾಗಕ್ಕೆ ಸರಿದು ಕುಳಿತೆ. ಸ್ವಲ್ಪ ಸಮಯದ ನಂತರ ಆತ, ಬಲ ಭಾಗದಲ್ಲಿದ್ದ ಕನ್ನಡಿಯಿಂದ ಮತ್ತೆ ದಿಟ್ಟಿಸುತ್ತಿದ್ದನ್ನು ಗಮನಿಸಿದೆ. ಆಗ ನಾನು ಯಾವ ಕನ್ನಡಿಗೂ ಕಾಣಿಸದಂತೆ ಸಂಪೂರ್ಣವಾಗಿ ಎಡಭಾಗಕ್ಕೆ ಸರಿದು ಕುಳಿತೆ. ಆಗ ಆತ ಹಿಂದೆ ತಿರುಗಿ ತಿರುಗಿ ನನ್ನನ್ನು ನೋಡಲು ಪ್ರಾರಂಭಿಸಿದ. ಮೊದಲು ನಾನು ಉಬರ್‌ನ ಸುರಕ್ಷತಾ ಕ್ರಮಗಳನ್ನು ಬಳಸಲು ಪ್ರಯತ್ನಿಸಿದೆ, ಆದರೆ ಯಾವುದೇ ಪ್ರಯೋಜನವಾಗಿಲ್ಲ. ಪ್ರಯಾಣಿಸಬೇಕಿದ್ದ ಅಂತರ ಕಡಿಮೆ ಇದ್ದಿದ್ದರಿಂದ ರೈಡ್‌ ಅನ್ನು ಕ್ಯಾನ್ಸಲ್ ಮಾಡಲಿಲ್ಲ’ ಎಂದು ಬರೆದುಕೊಂಡಿದ್ದಾರೆ.