ತಮಿಳುನಾಡು: ಆಂಥ್ರಾಕ್ಸ್‌ನಿಂದಾಗಿ ಹೆಣ್ಣು ಆನೆ ಸಾವು

ಕೊಯಮತ್ತೂರು:‘ಇಲ್ಲಿನ ಅನೈಕಟ್ಟಿ ಹೊರವಲಯದಲ್ಲಿರುವ ಅರಣ್ಯ ಪ್ರದೇಶದಲ್ಲಿ ಹೆಣ್ಣು ಆನೆಯ ಕಳೇಬರ ಪತ್ತೆಯಾಗಿತ್ತು. ಈ ಆನೆಯು ಆಂಥ್ರಾಕ್ಸ್‌ನಿಂದಾಗಿ ಮೃತಪಟ್ಟಿದೆ’ ಎಂದು ಅರಣ್ಯ ಇಲಾಖೆಯ ಮೂಲಗಳು ಮಂಗಳವಾರ ತಿಳಿಸಿವೆ.

ಕೊಯಮತ್ತೂರು ಅರಣ್ಯ ವ್ಯಾಪ್ತಿಗೆ ಒಳಪಡುವ ಈ ಪ್ರದೇಶದಲ್ಲಿ ಅಧಿಕಾರಿಗಳುಸೋಮವಾರ ಗಸ್ತು ತಿರುಗುತ್ತಿದ್ದಾಗ 13 ವರ್ಷದ ಹೆಣ್ಣು ಆನೆಯ ಕಳೇಬರ ಪತ್ತೆಯಾಗಿತ್ತು.

‘ಆನೆಯ ಬಾಯಿ ಮತ್ತು ಗುದದ್ವಾರದಿಂದ ಹೊರಬಂದಿದ್ದ ರಕ್ತದ ಮಾದರಿಯನ್ನು ಸಂಗ್ರಹಿಸಲಾಗಿತ್ತು. ರಕ್ತದ ಮಾದರಿಯಲ್ಲಿ ಆಂಥ್ರಾಕ್ಸ್‌ ಬ್ಯಾಕ್ಟೀರಿಗಳಿರುವುದು ಪರೀಕ್ಷೆಯಿಂದ ತಿಳಿದುಬಂದಿದೆ’ ಎಂದು ಮೂಲಗಳು ತಿಳಿಸಿವೆ.