ರಾಮ ಮಂದಿರಕ್ಕೆ ಟೈಟಾನಿಯಂ ಬಳಕೆ: ಜಗತ್ತಿನಲ್ಲಿಯೇ ಮೊದಲು

ಲಖನೌ: ಉತ್ತರ ಪ್ರದೇಶದ ಅಯೋಧ್ಯೆಯಲ್ಲಿ ನಿರ್ಮಾಣ ಹಂತದಲ್ಲಿರುವ ರಾಮಮಂದಿರದ ಸದೃಢತೆ ಹೆಚ್ಚಿಸಲು ಟೈಟಾನಿಯಂ ಲೋಹವನ್ನು ಬಳಕೆ ಮಾಡಲಾಗುತ್ತಿದೆ. ಇದು ಅತ್ಯಂತ ಬಲಿಷ್ಠ, ಹಗುರ, ತುಕ್ಕು ಹಿಡಿಯದ ಲೋಹವಾಗಿದೆ. 

ರಾಮ ಮಂದಿರ ನಿರ್ಮಾಣ ಸಮಿತಿ ಅಧ್ಯಕ್ಷ ನೃಪೇಂದ್ರ ಮಿಶ್ರಾ ಅವರು, ‌‘ಜಗತ್ತಿನಲ್ಲಿಯೇ ಮೊದಲ ಬಾರಿಗೆ ದೇಗುಲ ನಿರ್ಮಾಣ ಕಾಮಗಾರಿಗೆ ಟೈಟಾನಿಯಂ ಲೋಹವನ್ನು ಬಳಕೆ ಮಾಡಲಾಗುತ್ತಿದೆ’ ಎಂದು ತಿಳಿಸಿದರು.

ದೇಗುಲದ 32 ಕಂಬಿಗಳನ್ನು (ಗ್ರಿಲ್‌) ಟೈಟಾನಿಯಂನಿಂದ ನಿರ್ಮಿಸಲಾಗಿದೆ. ಈ ಪೈಕಿ ಒಂದನ್ನು ಶನಿವಾರ ಪ್ರಾಯೋಗಿಕವಾಗಿ ಅಳವಡಿಸಲಾಗಿದೆ. ಈ ಕಂಬಿಗಳ ಅಳವಡಿಕೆ ಕಾರ್ಯವು ಆಗಸ್ಟ್‌ 15ಕ್ಕೆ ಪೂರ್ಣಗೊಳ್ಳಲಿದೆ ಎಂದರು.

ಈ ಲೋಹದ ಬಳಕೆಗೆ ಶ್ರೀ ರಾಮಜನ್ಮಭೂಮಿ ತೀರ್ಥ ಕ್ಷೇತ್ರ ಟ್ರಸ್ಟ್‌ ಒಪ್ಪಿಗೆ ನೀಡಿದೆ. ಟೈಟಾನಿಯಂ ಲೋಹವು ಸುಮಾರು ಒಂದು ಸಾವಿರ ವರ್ಷಗಳ ಕಾಲ ಬಾಳಿಕೆ ಬರುತ್ತದೆ ಎಂದು ಹೇಳಿದರು.