ತ್ರಿಪುರಾದಲ್ಲಿ ಇದೇ ಮೊದಲ ಬಾರಿಗೆ ಮೂರು ಮರಿಗಳಿಗೆ ಜನ್ಮ ನೀಡಿದ ಹುಲಿ

ಅಗರ್ತಲಾ: ಈಶಾನ್ಯ ರಾಜ್ಯವಾದ ತ್ರಿಪುರಾದಲ್ಲಿ ಇದೇ ಮೊದಲ ಬಾರಿಗೆ ಹುಲಿಯೊಂದು ಮೂರು ಮರಿಗಳಿಗೆ ಜನ್ಮ ನೀಡಿದೆ.

ತ್ರಿಪುರಾದ ಶಿಪಾಹಿಜಾಲಾ ಜಿಲ್ಲೆಯ ಶಿಪಾಹಿಜಾಲಾ ವನ್ಯಧಾಮದಲ್ಲಿ ಹೆಣ್ಣು ಹುಲಿ ‘ಶಿಫಾಲಿ’ ಒಮ್ಮೆಗೆ ಮೂರು ಮರಿಗಳಿಗೆ ಜನ್ಮ ನೀಡಿದೆ.

1972ರಲ್ಲಿ ಶಿಪಾಹಿಜಾಲಾ ವನ್ಯಧಾಮ ಸ್ಥಾಪನೆಯ ನಂತರ ಇದೇ ಮೊದಲ ಬಾರಿಗೆ ಹುಲಿ, ಮರಿಗಳಿಗೆ ಜನ್ಮ ನೀಡಿದೆ. 2014ರಲ್ಲಿ ಹುಲಿಯೊಂದು ಗರ್ಭದಲ್ಲೇ ಸತ್ತ ಮರಿಗೆ ಜನ್ಮನೀಡಿತ್ತು.

ಕಳೆದ ವರ್ಷ ಫೆಬ್ರುವರಿಯಲ್ಲಿ ಪಶ್ಚಿಮ ಬಂಗಾಳದಿಂದ ಒಂದು ಗಂಡು ಒಂದು ಹೆಣ್ಣು ಹುಲಿ ತರಲಾಗಿತ್ತು. ಸಂತಾನ ವೃದ್ದಿಯಾಗಿರುವುದು ಸಂತಸ ತರಿಸಿದೆ. ಮರಿಗಳು ಆರೋಗ್ಯವಾಗಿದ್ದು, ನಿಗಾದಲ್ಲಿ ಇರಿಸಲಾಗಿದೆ ಎಂದು ವನ್ಯಧಾಮದ ನಿರ್ದೇಶಕ ವಿಶ್ವಜೀತ್ ದಾಸ್ ಹೇಳಿದ್ದಾರೆ.

ಈ ಬೆಳವಣಿಗೆ ತ್ರಿಪುರಾ ರಾಜ್ಯದಲ್ಲಿ ವನ್ಯಜೀವಿ, ಕಾಡು ಸಂರಕ್ಷಣೆಯ ಕಾಳಜಿಯನ್ನು ಎತ್ತಿತೋರಿಸುತ್ತದೆ. ಪ್ರತಿ ವರ್ಷ ಒಂದೂವರೆ ಲಕ್ಷ ಜನ ಶಿಪಾಹಿಜಾಲಾ ವನ್ಯಧಾಮಕ್ಕೆ ಭೇಟಿ ನೀಡುತ್ತಾರೆ ಎಂದು ಅವರು ತಿಳಿಸಿದ್ದಾರೆ.