ಕೋವಿಡ್–19: ಚೇತರಿಕೆ ಸಂಖ್ಯೆಯಲ್ಲಿ ಅಮೆರಿಕಕ್ಕಿಂತ ಮುಂದಿದೆ ಭಾರತ

ನವದೆಹಲಿ: ದೇಶದಲ್ಲಿ ದಿನವೊಂದರಲ್ಲಿ ಪತ್ತೆಯಾದ ಹೊಸ ಕೊರೊನಾ ಪ್ರಕರಣಗಳಿಗಿಂತಲೂ ಗುಣಮುಖರಾದವರ ಸಂಖ್ಯೆ ಶನಿವಾರ ಹೆಚ್ಚಾಗಿದೆ. ಜತೆಗೆ, ಚೇತರಿಕೆ ಪ್ರಮಾಣದಲ್ಲಿ ಈಗ ಭಾರತವು ಅಮೆರಿಕವನ್ನೂ ಮೀರಿಸಿದೆ.

ದೇಶದಲ್ಲಿ ಈವರೆಗೆ 53,08,014 ಜನರಿಗೆ ಸೋಂಕು ತಗುಲಿದ್ದು, ಸುಮಾರು 42,08,431 ಮಂದಿ ಗುಣಮುಖರಾಗಿದ್ದಾರೆ.

ದೇಶದಲ್ಲಿ ಶನಿವಾರ ಬೆಳಿಗ್ಗೆ ವರೆಗೆ 24 ಗಂಟೆ ಅವಧಿಯಲ್ಲಿ 95,880 ಮಂದಿ ಸೋಂಕಿನಿಂದ ಗುಣಮುಖರಾಗಿದ್ದಾರೆ. ಈ ಅವಧಿಯಲ್ಲಿ 93,337 ಮಂದಿಗೆ ಸೋಂಕು ತಗುಲಿತ್ತು.

ಇದನ್ನೂ ಓದಿ:Covid-19 India Update: 53 ಲಕ್ಷ ದಾಟಿದ ಸೋಂಕಿತರು, 42 ಲಕ್ಷ ಮಂದಿ ಗುಣಮುಖ

1,247 ಜನ ಸಾವಿಗೀಡಾಗುವುದರೊಂದಿಗೆ ಮೃತಪಟ್ಟವರ ಸಂಖ್ಯೆ 85,619ಕ್ಕೆ ಏರಿಕೆಯಾಗಿದೆ. ಸಾವಿನ ಪ್ರಮಾಣ ಶೇ 1.61ಕ್ಕೆ ಇಳಿಕೆಯಾಗಿರುವುದು ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆಯ ಅಂಕಿಅಂಶಗಳಿಂದ ತಿಳಿದುಬಂದಿದೆ.

ದೇಶದಲ್ಲಿ ಆಗಸ್ಟ್ 7ರಂದು ಸೋಂಕಿತರ ಸಂಖ್ಯೆ 20 ಲಕ್ಷ ಗಡಿ ದಾಟಿತ್ತು. ಆಗಸ್ಟ್ 23ರಂದು 30 ಲಕ್ಷ, ಸೆಪ್ಟೆಂಬರ್ 5ರಂದು 40 ಲಕ್ಷ ಹಾಗೂ ಸೆಪ್ಟೆಂಬರ್ 16ರಂದು 50 ಲಕ್ಷ ದಾಟಿದೆ.

ಜಾನ್ಸ್‌ ಹಾಪ್‌ಕಿನ್ಸ್‌ ವಿಶ್ವವಿದ್ಯಾಲಯದ ಕೊರೊನಾ ವೈರಸ್ ರಿಸೋರ್ಸ್‌ ಸೆಂಟರ್ ಮಾಹಿತಿ ಪ್ರಕಾರ, ಅಮೆರಿಕದಲ್ಲಿ ಈವರೆಗೆ 67,25,044 ಮಂದಿಗೆ ಸೋಂಕು ತಗುಲಿದೆ. 1,98,597 ಜನ ಮೃತಪಟ್ಟಿದ್ದು, 25,56,465 ಮಂದಿ ಗುಣಮುಖರಾಗಿದ್ದಾರೆ.

ಇದನ್ನೂ ಓದಿ:Covid-19 Vaccine Update | 2021ರ ಮಾರ್ಚ್ ಒಳಗೆ ಲಸಿಕೆ ಲಭ್ಯತೆ ಸಾಧ್ಯತೆ