ಕಾಶ್ಮೀರ ವಿಷಯ: ಸ್ಥಿರತೆಗೆ ಪ್ರಬಲ ಸವಾಲು –ಸೌದಿ ಅರೇಬಿಯಾ ಸಚಿವ

ನವದೆಹಲಿ: ‘ಕಾಶ್ಮೀರ ವಿಷಯವು ಅಲ್ಲಿನ ವಲಯದಲ್ಲಿ ಭದ್ರತೆ ಮತ್ತು ಸ್ಥಿರತೆಗೆ ಪ್ರಬಲ ಸವಾಲಾಗಿದೆ’ ಎಂದು ಸೌದಿ ಅರೇಬಿಯಾದ ವಿದೇಶಾಂಗ ಸಚಿವ, ರಾಜ ಫೈಸಲ್ ಬಿನ್‌ ಫರ್ಹಾನ್‌ ಅಭಿಪ್ರಾಯಪಟ್ಟಿದ್ದಾರೆ.

ನ್ಯೂಯಾರ್ಕ್‌ನಲ್ಲಿ ಸೆಪ್ಟೆಂಬರ್ 20ರಂದು ನಡೆದಿದ್ದ ಆರ್ಗನೈಸೇಷನ್ ಆಫ್‌ ಇಸ್ಲಾಮಿಕ್‌ ಕಾರ್ಪೊರೇಷನ್‌ನ (ಒಐಸಿ) ಉಪ ಸಮಿತಿ ಸಭೆಯಲ್ಲಿ ಅವರು ಈ ಹೇಳಿಕೆಯನ್ನು ನೀಡಿದ್ದಾರೆ ಎಂದು ಸೌದಿ ಮೂಲದ ನಿಯತಕಾಲಿಕ ಅರಬ್‌ ನ್ಯೂಸ್‌ ವರದಿ ಮಾಡಿದೆ.

ಇಸ್ಲಾಮಿಕ್‌ ಜನರನ್ನು ಬೆಂಬಲಿಸುವುದು ಸೌದಿ ಅರೇಬಿಯಾದ ದೃಢವಾದ ನಂಬಿಕೆಯಾಗಿದ್ದು, ಆ ನಿಟ್ಟಿನಲ್ಲಿ ಪ್ರಯತ್ನಗಳು ನಡೆದಿವೆ. ಈ ತಿಕ್ಕಾಟದಲ್ಲಿ ಭಾಗಿಯಾಗಿರುವವರ ನಡುವೆ ಮಧ್ಯಸ್ಥಿಕೆ ವಹಿಸುವ ಸೌದಿಯ ಪ್ರಯತ್ನವು ಕುಗ್ಗಿಲ್ಲ ಎಂದು ಹೇಳಿದ್ದಾರೆ.

ಆದರೆ, ಕಾಶ್ಮೀರ ವಿಷಯದಲ್ಲಿ ಯಾವುದೇ ರಾಷ್ಟ್ರದ ಮಧ್ಯಸ್ಥಿಕೆಯನ್ನು ಭಾರತವು ಈಗಾಗಲೇ ಸಾರಾಸಗಟಾಗಿ ತಳ್ಳಿಹಾಕಿದೆ. ಇದು, ಉಭಯ ದೇಶಗಳ ನಡುವಿನ ದ್ವಿಪಕ್ಷೀಯ ವಿಷಯವಾಗಿದೆ ಎಂದು ಭಾರತ ಪ್ರತಿಪಾದಿಸಿದೆ.