ತಿರುವನಂತಪುರಂ: ಸದ್ಯ ವಿವಿಧ ಉದ್ದೇಶಗಳಿಗಾಗಿ ಸರ್ಕಾರದ ಎಲ್ಲ ಇಲಾಖೆಗಳಲ್ಲಿ ಬಳಸಲಾಗುತ್ತಿರುವ ಅರ್ಜಿಗಳ ನಮೂನೆಗಳನ್ನು ಪರಿಷ್ಕರಿಸಿ, ಲಿಂಗ ಸೂಚಕ ಆಯ್ಕೆಯಲ್ಲಿ ‘ಲೈಂಗಿಕ ಅಲ್ಪಸಂಖ್ಯಾತ’ ಸೇರಿಸಲು ಕೇರಳ ಸರ್ಕಾರ ನಿರ್ಧರಿಸಿದೆ. ಈ ಕುರಿತು ಆರೋಗ್ಯ ಮತ್ತು ಸಾಮಾಜಿಕ ನ್ಯಾಯ ಸಚಿವೆ ಕೆ.ಕೆ.ಶೈಲಜಾ ಸೋಮವಾರ ಪ್ರಕಟಿಸಿದ್ದಾರೆ.
‘ಇದು ಲೈಂಗಿಕ ಅಲ್ಪಸಂಖ್ಯಾತ ಸಮುದಾಯದ ಅಭಿವೃದ್ಧಿಗೆ ಸಿಕ್ಕ ಮತ್ತೊಂದು ಮನ್ನಣೆಯಾಗಿದೆ. ಇದರಿಂದ ಈ ಸಮುದಾಯದ ಏಳಿಗೆಗೆ ನೆರವಾಗಲಿದೆ’ ಎಂದು ಶೈಲಜಾ ಅಭಿಪ್ರಾಯಪಟ್ಟಿದ್ದಾರೆ. ಕೊನೇ ಸ್ಥರದಲ್ಲಿರುವ ಸಮುದಾಯವನ್ನೂ ತಲುಪುವ ಉದ್ದೇಶದಿಂದ ಈ ಕ್ರಮ ಕೈಗೊಳ್ಳಲಾಗಿದೆಯೆಂದೂ ಅವರು ತಿಳಿಸಿದ್ದಾರೆ.
ಕೇರಳದಲ್ಲಿ ಲೈಂಗಿಕ ಅಲ್ಪಸಂಖ್ಯಾತರ ನೀತಿ ಜಾರಿಯಲ್ಲಿದ್ದು, ಲಿಂಗಪರಿವರ್ತನೆ ಶಸ್ತ್ರಚಿಕಿತ್ಸೆಗೆ ಸರ್ಕಾರ ಹಣಕಾಸಿನ ನೆರವು ನೀಡುತ್ತದೆ. ಹೀಗಾಗಿ ಈ ಕ್ರಮ ಕೈಗೊಳ್ಳಲಾಗಿದೆ. ಇನ್ನು ಮುಂದೆ ಸರ್ಕಾರದ ಎಲ್ಲ ಅರ್ಜಿಗಳಲ್ಲಿ ಮಹಿಳೆ / ಪುರುಷ / ಲೈಂಗಿಕ ಅಲ್ಪಸಂಖ್ಯಾತ / ಟ್ರಾನ್ಸ್ವುಮೆನ್ / ಟ್ರಾನ್ಸ್ಮೆನ್ ಆಯ್ಕೆ ನೀಡಲಾಗುವುದು.
ಕೇರಳ, 2014ರಲ್ಲಿ ಸುಪ್ರೀಂಕೋರ್ಟ್ ಮಹತ್ವದ ತೀರ್ಪು ನೀಡಿದ ಬಳಿಕ ಲೈಂಗಿಕ ಅಲ್ಪಸಂಖ್ಯಾತರ ನೀತಿ ಘೋಷಿಸಿದ ಮೊದಲ ರಾಜ್ಯ ಎನಿಸಿಕೊಂಡಿದೆ. ಈ ನೀತಿಯು ಈ ಸಮುದಾಯದವರಿಗೆ ಸಮಾನತೆ ಮತ್ತು ಸಮಾನ ರಕ್ಷಣೆಯ ಹಕ್ಕನ್ನು ಖಾತ್ರಿಪಡಿಸುತ್ತದೆ.
ಇತ್ತೀಚೆಗೆ ಇಲ್ಲಿನ ಮಹಿಳಾಭಿವೃದ್ಧಿ ನಿಗಮವು ಸ್ವ–ಉದ್ಯೋಗ ಆರಂಭಿಸುವ ಲೈಂಗಿಕ ಅಲ್ಪಸಂಖ್ಯಾತರಿಗಾಗಿ ರೂ.3ರಿಂದ 15 ಲಕ್ಷದ ವರೆಗೆ ಸಾಲ ಸೌಲಭ್ಯ ನೀಡುವುದಾಗಿ ಘೋಷಿಸಿದೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.