ಮಹಾರಾಷ್ಟ್ರದಲ್ಲಿ ವೇತನ ಕಡಿತ ಇಲ್ಲ: ಆದೇಶ ಹಿಂಪಡೆದ ಸರ್ಕಾರ

ಮುಂಬೈ: ಮಹಾರಾಷ್ಟ್ರದಲ್ಲಿ ಜನಪ್ರತಿನಿಧಿಗಳ ವೇತನ ಕಡಿತಗೊಳಿಸುವುದಾಗಿ ಮಂಗಳವಾರ ಘೋಷಿಸಿದ್ದ ರಾಜ್ಯ ಸರ್ಕಾರ, ಕೆಲವೇ ತಾಸುಗಳಲ್ಲಿ ಈ ನಿರ್ಣಯ ಹಿಂಪಡೆಯಿತು.

ಇದರ ಬದಲಿಗೆ ಮುಖ್ಯಮಂತ್ರಿ, ಉಪಮುಖ್ಯಮಂತ್ರಿ, ಸಚಿವರು ಸೇರಿದಂತೆ ಎಲ್ಲಾ ಚುನಾಯಿತ ಪ್ರತಿನಿಧಿಗಳ ವೇತನವನ್ನು ತಡವಾಗಿ ಎರಡು ಕಂತುಗಳಲ್ಲಿ ನೀಡಲಾಗುತ್ತದೆ ಎಂದು ಅಧಿಕೃತ ಪ್ರಕಟಣೆಯಲ್ಲಿ ಹೇಳಲಾಗಿದೆ.

ಪೌರಾಡಳಿತ ಸಂಸ್ಥೆಗಳ ಪ್ರತಿನಿಧಿಗಳಿಗೆ ಮಾರ್ಚ್ ತಿಂಗಳ ಶೇ 40 ವೇತನವನ್ನು ಮಾತ್ರ ನೀಡಲಾಗುತ್ತದೆ. ರಾಜ್ಯ ಸರ್ಕಾರದ ಎ ಹಾಗೂ ಬಿ ದರ್ಜೆಯ ಉದ್ಯೋಗಿಗಳಿಗೆ ಶೇ 50, ಸಿ ದರ್ಜೆ ಉದ್ಯೋಗಿಗಳಿಗೆ ಶೇ 75 ವೇತನ ನೀಡಲಾಗುವುದು. ಡಿ ದರ್ಜೆ ಉದ್ಯೋಗಿಗಳ ವೇತನದಲ್ಲಿ ಯಾವುದೇ ಕಡಿತ ಇಲ್ಲ. ಏಪ್ರಿಲ್ ತಿಂಗಳ ವೇತನಕ್ಕೂ ಇದು ಅನ್ವಯವಾಗಲಿದೆ ಎಂದು ಪ್ರಕಟಣೆಯಲ್ಲಿ ತಿಳಿಸಲಾಗಿದೆ.