ಮೋದಿ ಜನ್ಮದಿನ: ನಿರುದ್ಯೋಗ ದಿನ ಆಚರಿಸಿದ ಯುವ ಕಾಂಗ್ರೆಸ್

ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿ ಅವರ ಜನ್ಮದಿನವನ್ನು ಯುವ ಕಾಂಗ್ರೆಸ್ ಕಾರ್ಯಕರ್ತರು ರಾಷ್ಟ್ರೀಯ ನಿರುದ್ಯೋಗ ದಿನವನ್ನಾಗಿ ಬುಧವಾರ ಆಚರಿಸಿದರು.

 ನಿರುದ್ಯೋಗವು ಕಳೆದ ಐದು ದಶಕಗಳಲ್ಲೇ ಗರಿಷ್ಠ ಮಟ್ಟದಲ್ಲಿದೆ ಎಂದು ಆರೋಪಿಸಿ ಪ್ರತಿಭಟನೆ ನಡೆಸಿದರು.

ಪ್ರತಿಭಟನೆಯನ್ನು ಉದ್ದೇಶಿಸಿ ಮಾತನಾಡಿದ ಯುವ ಕಾಂಗ್ರೆಸ್ ಅಧ್ಯಕ್ಷ ಉದಯ್ ಭಾನು ಚಿಬ್, ‘ಮತಗಳ್ಳತನದ ಮೂಲಕ ಮೋದಿ ಪ್ರಧಾನಿಯಾಗಿರುವ ಕಾರಣಕ್ಕೆ, ಇಂದು ನಿರುದ್ಯೋಗ ಕಳೆದ 50 ವರ್ಷಗಳಲ್ಲೆ ಗರಿಷ್ಠ ಮಟ್ಟದಲ್ಲಿದೆ ಎಂದು ಹೇಳಿದರು.

ಇದು ದೇಶದ ಯುವಜನರ ಧ್ವನಿಯಾಗಿದ್ದು, ಯುವಜನರಿಗೆ ಉದ್ಯೋಗ ಲಭಿಸುವವರೆಗೆ ನಾವು ಮೌನವಾಗುವುದಿಲ್ಲ ಎಂದು ಅವರು ಹೇಳಿದರು.

ಇಲ್ಲಿನ ಪಕ್ಷದ ಕಚೇರಿಯಲ್ಲಿ ಚಹಾ ಮತ್ತು ಪಕೋಡ ಮಳಿಗೆ ತೆರೆದ ಕಾಂಗ್ರೆಸ್ ಕಾರ್ಯಕರ್ತರು, ಅದನ್ನು ಕಪ್ಪು ಬಲೂನುಗಳ ಮೂಲಕ ಅಲಂಕರಿಸಿದರು. ವಿದ್ಯಾವಂತ ಯುವಕರು ನಿರುದ್ಯೋಗದ ಕಾರಣಕ್ಕಾಗಿ ಅರ್ಹ ಉದ್ಯೋಗ ಪಡೆಯುತ್ತಿಲ್ಲ ಎಂದು ಅವರು ಆರೋಪಿಸಿದರು.