ನೌಕಾಪಡೆಯ ಬಲ ಹೆಚ್ಚಿಸಬೇಕಿದೆ: ನೌಕಾಪಡೆಯ ಮುಖ್ಯಸ್ಥ ಕರಂಬೀರ್ ಸಿಂಗ್

ನವದೆಹಲಿ: ‘ದೇಶದ ನೌಕಾಪಡೆಯ ಬಲವನ್ನು ಹೆಚ್ಚಿಸಲು ಮೂರನೇ ಯುದ್ಧವಿಮಾನವಾಹಕ ನೌಕೆಯ ಅನಿವಾರ್ಯ ಇದೆ. ದೇಶದ ಆರ್ಥಿಕತೆಯನ್ನು 5 ಲಕ್ಷ ಕೋಟಿ ಡಾಲರ್‌ಗೆ (ಸುಮಾರು ₹370 ಲಕ್ಷ ಕೋಟಿ) ಹೆಚ್ಚಿಸುವ ದಿಸೆಯಲ್ಲಿ ಇದು ನೆರವಾಗಲಿದೆ’ ಎಂದು ನೌಕಾಪಡೆಯ ಮುಖ್ಯಸ್ಥ ಕರಂಬೀರ್ ಸಿಂಗ್ ಅವರು ಹೇಳಿದ್ದಾರೆ.

ಡಿಸೆಂಬರ್ 4ರಂದು ನೌಕಪಡೆ ದಿನವನ್ನು ಆಚರಿಸಲಾಗುತ್ತದೆ. ಈ ಸಂಬಂಧ ಮಾಧ್ಯಮಗೋಷ್ಠಿ ನಡೆಸಿ, ಮಾಹಿತಿ ಹಂಚಿಕೊಳ್ಳುವಾಗ ಅವರು ಈ ಮಾತು ಹೇಳಿದ್ದಾರೆ. ಮೂರನೇ ಯುದ್ಧ ವಿಮಾನವಾಹಕ ನೌಕೆಯ ಅಗತ್ಯದ ಬಗ್ಗೆ ಪ್ರಸ್ತಾವ ಸಿದ್ಧಪಡಿಸಲಾಗುತ್ತಿದೆ. ಇದಕ್ಕಾಗಿ ಅಗತ್ಯವಿರುವ ತಾಂತ್ರಿಕ ವಿವರಗಳನ್ನು ಕಲೆಹಾಕಲಾಗುತ್ತಿದೆ. ಆನಂತರವೇ ಸರ್ಕಾರಕ್ಕೆ ಪ್ರಸ್ತಾವ ಸಲ್ಲಿಸಲಾಗುತ್ತದೆ ಎಂದು ಅವರು ಹೇಳಿದ್ದಾರೆ. ಹಿಂದೂ ಮಹಾಸಾಗರದಲ್ಲಿ ಚೀನಾದ ಪ್ರಭಾವ ಏರುತ್ತಿದೆ. ಈ ಭಾಗದಲ್ಲಿ ಚೀನಾದ ನೌಕಾಪಡೆಯ ಪ್ರಾಬಲ್ಯ ಹೆಚ್ಚುತ್ತಿದೆ. ಈ ಅಪಾಯವನ್ನು ಎದುರಿಸಲು ಭಾರತದ ನೌಕಾಪಡೆಗೆ ಮೂರು ಯುದ್ಧ ವಿಮಾನವಾಹಕ ನೌಕೆಗಳ ಅವಶ್ಯಕತೆ ಇದೆ ಎಂದು ತಜ್ಞರು ಹೇಳಿದ್ದಾರೆ.

ನೌಕಾಪಡೆಯಲ್ಲಿ ಈಗ ಒಂದು ಯುದ್ಧ ವಿಮಾನವಾಹಕ ನೌಕೆ ಮಾತ್ರ ಇದೆ. 2020ರ ವೇಳೆಗೆ ಇನ್ನೊಂದು ಯುದ್ಧ ವಿಮಾನವಾಹಕ ನೌಕೆಯು ನೌಕಾಪಡೆಗೆ ಸೇರ್ಪಡೆಯಾಗಲಿದೆ.