ಮಹಾಕುಂಭಮೇಳದ ತ್ರಿವೇಣಿ ಸಂಗಮದಲ್ಲಿ ಪುಣ್ಯ ಸ್ನಾನ ಮಾಡಿದ ಪ್ರಧಾನಿ ಮೋದಿ

ಲಖನೌ: ಪ್ರಯಾಗರಾಜ್‌ನಲ್ಲಿ ನಡೆಯುತ್ತಿರುವ ಮಹಾಕುಂಭ ಮೇಳದ ಅಂಗವಾಗಿ ಪ್ರಧಾನಿ ನರೇಂದ್ರ ಮೋದಿ ಅವರು ತ್ರಿವೇಣಿ ಸಂಗಮದಲ್ಲಿ ಬುಧವಾರ ಪವಿತ್ರ ಸ್ನಾನ ಮಾಡಿದರು. ವೈದಿಕರ ಮಂತ್ರಘೋಷಗಳ ಮಧ್ಯೆ ಕೈಯಲ್ಲಿ ರುದ್ರಾಕ್ಷಿ ಜಪಮಾಲೆ ಹಿಡಿದ ಪ್ರಧಾನಿ ಮೋದಿ ಅವರು ಗಂಗಾ ನದಿಗೆ ಆರತಿ ಬೆಳಗಿ, ಸೂರ್ಯನಿಗೆ ಅರ್ಗ್ಯ ಅರ್ಪಿಸಿದರು.

ಸೀರೆ, ಹಾಲು ಹಾಗೂ ಹೂವುಗಳನ್ನು ಗಂಗಾ ನದಿಗೆ ಅರ್ಪಿಸಿ ಪ್ರಧಾನಿ ಮೋದಿ ಅವರು ಪೂಜೆ ಸಲ್ಲಿಸಿದರು. ಪ್ರಧಾನಿ ಅವರು ಪವಿತ್ರ ಸ್ನಾನ ಮಾಡಲು ಹಾಗೂ ಪೂಜೆ ಸಲ್ಲಿಸಲು ತ್ರಿವೇಣಿ ಸಂಗಮದ ಬಳಿ ವಿಶೇಷ ವ್ಯವಸ್ಥೆ ಮಾಡಲಾಗಿತ್ತು. ಹೆಚ್ಚಿನ ಭದ್ರತಾ ಸಿಬ್ಬಂದಿಯನ್ನು ನಿಯೋಜಿಸಲಾಗಿತ್ತು.

ಉತ್ತರ ಪ್ರದೇಶ ಮುಖ್ಯಮಂತ್ರಿ ಆದಿತ್ಯನಾಥ್‌ ಅವರು ಪ್ರಧಾನಿ ಮೋದಿ ಅವರೊಂದಿಗೆ ಜೊತೆಗೂಡಿದ್ದರು. ಸಂಗಮಕ್ಕೆ ತಲುಪುವ ಮೊದಲು ಪ್ರಧಾನಿ ಮೋದಿ ಹಾಗೂ ಯೋಗಿ ಆದಿತ್ಯನಾಥ್‌ ಅವರು ಗಂಗಾ ನದಿಯಲ್ಲಿ ಬೋಟ್‌ ವಿಹಾರ ನಡೆಸಿದರು. ಈ ವೇಳೆ ನದಿಯ ತಟಗಳಲ್ಲಿ ನಿಂತಿದ್ದ ಭಕ್ತರತ್ತ ಪ್ರಧಾನಿ ಮೋದಿ ಅವರು ಕೈಬೀಸಿದರು.

ಒಟ್ಟು ಎರಡು ತಾಸುಗಳವರೆಗೆ ಅವರು ಪ್ರಯಾಗರಾಜ್‌ನಲ್ಲಿದ್ದರು. ಆದರೆ, ಮಹಾಕುಂಭ ಮೇಳದಲ್ಲಿದ್ದ ಸಂತರನ್ನು ಮೋದಿ ಅವರು ಭೇಟಿಯಾಗಲಿಲ್ಲ. ಸಂತರನ್ನು ಭೇಟಿಯಾಗಲಿದ್ದಾರೆ ಎನ್ನಲಾಗಿತ್ತು. ಲೇಟೆ ಹುನುಮಾನ್‌ ಮಂದಿರ ಹಾಗೂ ನದಿ ತೀರದಲ್ಲಿರುವ ‘ಅಕ್ಷಯ್‌ವಟ್‌’ಗೂ ಮೋದಿ ಅವರು ಭೇಟಿ ನೀಡಲಿಲ್ಲ. ಮೋದಿ ಅವರು ಇಲ್ಲಿಗೆ ಬರಬಹುದು ಎಂದು ಭಕ್ತರು ನೂರಾರು ಸಂಖ್ಯೆಯಲ್ಲಿ ಇಲ್ಲಿ ಸೇರಿದ್ದರು.

ಬುಧವಾರ (ಫೆ.5) ಹಿಂದೂ ಕ್ಯಾಲೆಂಡರ್‌ನ ‘ಮಾಘ’ ಮಾಸದಲ್ಲಿ ಆಚರಿಸಲಾಗುವ ‘ಗುಪ್ತ ನವರಾತ್ರಿ’ಯ ‘ಅಷ್ಟಮಿ’ ದಿನವಾಗಿದ್ದರಿಂದ ಪ್ರಧಾನಿ ಮೋದಿ ಅವರು ಮಹಾಕುಂಭ ಮೇಳದಲ್ಲಿ ಭಾಗವಹಿಸಿದರು.