ಆಕೆಯೇನು ಕೊಲೆ ಮಾಡಿದ್ದಾರೆಯೇ? ಪೂಜಾ ಖೇಡ್ಕರ್‌ಗೆ ಜಾಮೀನು ನೀಡಿದ ‘ಸುಪ್ರೀಂ’

ನವದೆಹಲಿ: ಯುಪಿಎಸ್‌ಸಿ ಪರೀಕ್ಷೆಯಲ್ಲಿ ಜಾತಿ ಮತ್ತು ಅಂಗವಿಕಲ ಕೋಟಾದ ಮೀಸಲು ಅನುಕೂಲಕ್ಕಾಗಿ ಸುಳ್ಳು ಪ್ರಮಾಣಪತ್ರ ಸಲ್ಲಿಸಿದ್ದ ಆರೋಪ ಎದುರಿಸುತ್ತಿರುವ ಮಾಜಿ ಐಎಎಸ್ ಪ್ರೊಬೇಷನರಿ ಅಧಿಕಾರಿ ಪೂಜಾ ಖೇಡ್ಕರ್ ಅವರಿಗೆ ನಿರೀಕ್ಷಣಾ ಜಾಮೀನು ಮಂಜೂರಾಗಿದೆ.

ಬುಧವಾರ ಜಾಮೀನು ಮಂಜೂರು ಮಾಡಿದ ನ್ಯಾಯಮೂರ್ತಿಗಳಾದ ಬಿ.ವಿ.ನಾಗರತ್ನ, ಸತೀಶ್‌ ಚಂದ್ರ ಶರ್ಮಾ ಅವರಿದ್ದ ಸುಪ್ರೀಂ ಕೋರ್ಟ್‌ನ ಪೀಠ, ‘ಖೇಡ್ಕರ್ ಕೊಲೆ ಮಾಡಿಲ್ಲ. ಭಯೋತ್ಪಾದಕಿಯೂ ಅಲ್ಲ. ಆಕೆ ಮಾಡಿರುವ ಗಂಭೀರ ಅಪರಾಧವಾದರೂ ಏನು’ ಎಂದು ಪ್ರಶ್ನಿಸಿತು.

‘ನಿಮ್ಮ ಬಳಿ ಸೂಕ್ತ ತನಿಖಾ ವ್ಯವಸ್ಥೆ ಇರಬೇಕು. ಸಾಫ್ಟ್‌ವೇರ್‌ ಹೊಂದಿರಬೇಕು. ತನಿಖೆಯನ್ನು ಪೂರ್ಣಗೊಳಿಸಿ. ಆಕೆ ಎಲ್ಲವನ್ನೂ ಕಳೆದುಕೊಂಡಿದ್ದಾಳೆ. ಅವರಿಗೆ ಬೇರೆ ಎಲ್ಲೂ ಕೆಲಸ ಸಿಗುವುದಿಲ್ಲ’ ಎಂದು ಪೀಠ ಇದೇ ವೇಳೆ ಮೌಖಿಕವಾಗಿ ಅಭಿಪ್ರಾಯ ವ್ಯಕ್ತಪಡಿಸಿತು.